Azərbaycan, Bakı, 16 dekabr/ Trend , müxbir Ü.İsmayılova/ Noyabrda Bakının təkrar avtomobil bazarında qiymətlər 3,8 faiz, ilkin bazarda 10 faiz azalıb, - "Əmlak Bazarı İştirakçıları" İctimai Birliyindən çərşənbə axşamı bildiriblər.
Noyabrda paytaxtın avtomobil bazarına 6,5 min maşın təklif edilib. Onların yalnız 41 faizi noyabrda bazara çıxarılıb, qalan 59 faizi ötən aylardan qalıb.
Səkkiz ay ərzində təkliflərdə geri qalan və tələbatın oktyabrda yarım faiz artdığı Almaniyanın məşhur Mercedes Benz markası noyabrda yenidən "mövqelərini" 1,1 faiz güzəştə gedib.
Noyabrda təkrar bazarda Rusiya istehsalı olan avtomobillərə tələbat da artıb - 7,9 faiz. Bu ölkənin istehsalı olan avtomobillərin bazara təklifi isə 4,6 faizə bərabər olub. Tələbatın olduğu digər avtomobillər 85 ölkədən 20 şirkətin məhsuludur.
Təkrar avtomobil bazarında köhnə avtomobillərə marağın azalması müşahidə olunur. Belə ki, 1998-1999-cu illərin istehsalı olan maşınlar 1996-1997-ci illərin nəqliyyat vasitələrini bazardan sıxışdırmağa başlayıblar.
Birliyin ekspertlərinin rəyinə görə, yaxın gələcəkdə avtomobil alıcıları yalnız 2000-ci ildə və sonralar istehsal edilmiş maşınlara üstünlük verəcəklər.
Müəlliflə əlaqə saxlamaq üçün elektron ünvan: [email protected]