Azərbaycan, Bakı, 23 yanvar/ Trend , müxbir İ.Xəlilova/ Dünya proseslərinin və Azərbaycan hökumətinin apardığı anti-inflyasiya tədbirlərinin təsriri altında 2009-cu ildə ölkədə hətta təkrəqəmli inflyasiya belə deyil, deflyasiya müşahidə oluna bilər, - Azərbaycanın Dövlət Statistika Komitəsinin sədri Arif Vəliyev cümə günü 2008-ci ilin yekunlarına həsr olunmuş mətbuat konfransında bildirib.
Onun sözlərinə görə, yanvarda respublikanın ticarət obyektlərində aparılmış araşdırmalar qiymət artımının müşahidə olunmadığını göstərir.
"İlin sonunadək ölkədə belə vəziyyət davam edərsə, yalnız təkrəqəmli səviyyədə inflyasiyanın deyil, hətta deflyasiyanın olacağını gözləmək olar", - Vəliyev deyib.
2008-ci ilin yekunlarına görə, 2007-ci illə müqayisədə istehlak malları və tarifləri 20,8 faiz bahalaşıb, ötən ilin dekabrında isə 2007-ci ilin dekabrı ilə müqayisədə 0,4 faiz ucuzlaşıb.
Dekabr ərzində ərzaq mallarının qiyməti 1 faiz azalıb, qeyri-ərzaq mallarının qiyməti dəyişməz qalıb, xidmət tarifləri isə 0,5 faiz artıb.
2007-ci illə müqayisədə ərzaq malları 28,6 faiz, qeyri-ərzaq malları 11,5 faiz, xidmətlər sahəsində tariflər 11,4 faiz bahalaşıb.
Dövlət Statistika Komitəsi rəhbərinin sözlərinə görə, ötən il düyünün qiyməti - 49 faiz, kartof - 70 faiz, mal əti - 44 faiz, taxıl - 97 faiz bahalaşıb. Meyvələrin qiyməti azalıb.
"2007-ci illə müqayisədə ölkədə illik inflyasiya azalıb. Cari ilin birinci yarısında bəzi beynəlxalq təşkilatlar ölkədə inflyasiyanın 25-27 faiz səviyyəsində olacağını proqnozlaşdırırdılar. Qlobal amillər, eləcə də daxili siyasət sayəsində inflyasiyanın səviyyəsi proqnozlaşdırılandan aşağı olub", - Milli Bankın İdarə Heyətinin sədri Elman Rüstəmov Nazirlər Kabinetinin 2008-ci ildə sosial-iqtisadi inkişafın yekunları üzrə iclasında bildirib.
Onun rəyinə görə, 2009-cu ildə inflyasiya təxminən 16 faiz səviyyəsində proqnozlaşdırılır.
"Bu bizə cari ilin nəticələri üzrə inflyasiya göstəricilərinə nikbinliklə baxmağa imkan verir. Hesablamalarımıza görə, bu il təkrəqəmli inflyasiyaya nail olmaq real vəzifədir və biz belə nəticənin əldə olunmasına can atacağıq", - Rüstəmov deyib.
Müəlliflə əlaqə saxlamaq üçün elektron ünvan: [email protected]