Azərbaycan, Bakı, 24 aprel / Trend , müxbir İ.Xəlilova /
Azərbaycan Mərkəzi Bankının (AMB) qərarına əsasən, iki qeyri-bank kredit təşkilatlarının - Beyləqan rayonunda yerləşən "Apeks" və Bakıda yerləşən "Bayandurlu" - lisenziyası ləğv edilib. Bu barədə cümə günü AMB-dən bildiriblər.
"Apeks" kredit ittifaqının lisenziyasının geri alınmasına (lisenziya 2002-ci il yanvarın 14-də verilib) səbəb təşkilatın son üç il ərzində AMB-yə rüblik maliyyə hesabatlarını təqdim etməməsi və illik auditdən keçməməsidir.
"Bayandurlu" kredit ittifaqının lisenziyasının ləğvinə (lisenziya 2004-cü il noyabrın 24-də verilib) səbəb çoxsaylı xəbərdarlıqlara baxmayaraq normativlərin təşkilat tərəfindən mütəmadi pozulması və çatışmazlıqların aradan qaldırılmamasıdır. Lisenziyanın geri alınmasında təşkilatın illik auditdən yayınması da rol oynayıb.
Kredit ittifaqlarına ləğvetmə komissiyalarının yaradılması və təsviyyə ilə bağlı lazımi işlərin görülməsi tapşırılıb.
"Kredit ittifaqları haqında" qanuna əsasən, qeyri-bank kredit təşkilatları 11 nəfərlik heyətlə yaradılır və öz üzvlərini maliyyələşdirərək kredit əməliyyatları həyata keçirir. Sözügedən təşkilatlar banklar kimi hər rüb AMB-yə hesabat verməlidir.
Bu iki kredit ittifaqının bağlanması ilə ölkədə qeyri-bank kredit təşkilatlarının sayı 92-yə düşdü. Onun daxilində 73 kredit ittifaqı, humanitar təşkilatlar tərəfindən maliyyələşən 18 təşkilat və bir qeyri-bank kredit təşkilatı daxildir.
Məqalə müəllifi ilə əlaqə ünvanı: [email protected]
