İranın Nəqliyyat Nazirliyi və Almaniyanın Shel Gel şirkəti arasında Tehran - Məşhəd sürətli qatar yolunun tikintisi layihəsinin icrası ilə bağlı müqavilə imzalanıb. Bu barədə İran televiziyası məlumat yayıb.
Layihə 5 il müddətinə həyata keçiriləcək. Layihənin reallaşmasına 10 milyard dollar sərmayə yatırılacaq.
"Sürətli qatar dəmiryolunun tikilməsində relsdən istifadə olunmayacaq və uzunluğu 900 kilometr olan maqnit yastıq çəkiləcək", - İranın nəqliyyat naziri Həmid Behbəhani bildirib.
O əlavə edib ki, qatar saatda 500 kilometr qət etmək iqtidarında olacaq və 12 saatlıq Tehran - Məşhəd yolunu üç saatdan az bir zamanda qət edəcək. "Bu texnologiya yalnız Almaniyada mövcuddur və ilk dəfədir ki, Asiyada istifadə ediləcək. Qatar ildə 10-40 milyona qədər sərnişin daşımaq gücündə olacaq", - Behbəhani qeyd edib.
Behbəhaninin sözlərinə görə, layihəyə sərmayəni alman şirkət yatıracaq. "Yatırılmış sərmayələr BOT ["Build-Operate-Transfer"] qaydası ilə layihə icra olunduqdan sonra 20-30 il ərzində qaytarılacaq", - Behbəhani əlavə edib.
