Azərbaycan, Bakı, 28 iyul / Trend , müxbir N.İsmayılova /
İlin birinci yarısında Azərbaycanın dövlət büdcəsinin mədaxil sahəsinə faktiki gəlir proqnozlaşdırılan 5,21 milyard manata qarşı 4,86 milyard manat təşkil edib (proqnoz 93,4 faiz yerinə yetib) ki, keçən ilin müvafiq dövrü ilə müqayisədə 1,1 faiz (52,2 milyon manat) artıb. Bu barədə Azərbaycan Maliyyə Nazirliyinin məlumatında deyilir. İlin birinci yarısının yekunlarına görə, büdcə profisiti 424 milyon manat təşkil edib.
Struktura daxil olan pulun 33,5 faizi (1627 milyon manat) Vergilər Nazirliyinin (VN), 13,2 faizi (639,7 milyon manat) gömrük rüsumu və vergilərinin, 52 faizi (2530 milyon manat) Dövlət Neft Fondunun və 1,3 faizi (65,2 milyon manat) digər mənbələrin hesabına təmin olunub.
VN mədaxil proqnozunu 80,8 faiz icra etməklə dövlət budcəsini 1627 milyon manat vəsaitlə təmin edib ki, həmin vəsaitin 1165 milyon manatı qeyri-neft sektorundan daxilolmaların payına düşür. Bu göstərici keçən ilin müvafiq dövründəki göstəricini 11,4 faiz (118,9 milyon manat) ötür.
2009-cu ilin altı ayında Dövlət Gömrük Komitəsi proqnoza 100,1 faiz əməl edərək büdcəni 639,7 milyon manat vəsaitlə təmin edib ki, bu da 2008-ci ilin muvafiq dövrü ilə müqayisədə 75,8 milyon manat və ya 13,4 faiz coxdur.
Azərbaycan Respublikası Dövlət Neft Fondundan büdcəyə ötən ilin eyni dövrünə nisbətən 1260 milyon manatdan çox və yaxud 2530 milyon manat vəsait daxil olub.
2009-cu ilin altı ayında dövlət büdcəsinin xərcləri 5220,9 milyon manat proqnoza qarşı 4437,9 milyon manat və ya 85 faiz icra edilsə də, bu göstərici 2008-ci ilin eyni dövrü ilə müqayisədə 343,3 milyon manat və ya 8,4 faiz çoxdur.
Ötən yarımil ərzində sosial tədbirlərin maliyyələşməsinə 28,8 faiz (1279,8 milyon manat) büdcə xərcləri ayrılıb ki, bu da keçən ilin eyni dövründəki göstəricini 31,6 faiz (307,3 milyon manat) üstələyir.
Büdcə vəsaitindən kənd, meşə təsərrüfatına, balıqçılığa, eləcə də ətraf mühitin mühafizəsinə xərclər 1,6 dəfə (48,5 milyon manat), prokurorluq, təhlükəsizlik, hüquq-mühafizə orqanlarının, məhkəmə hakimiyyətinin təminatına 48,3 faiz (90,1 milyon manat), təhsilə 33,8 faiz (129,6 milyon manat), səhiyyəyə 33,5 faiz (40,6 milyon manat), əhalinin sosial təminatı və müdafiəsinə 31,5 faiz (129,5 milyon manat), ümumi dövlət xidmətlərinin göstərilməsinə 17,4 faiz (51,3 milyon manat), mədəniyyət, incəsənət, informasiya, fiziki tərbiyə sahəsində fəaliyyətə 13,6 faiz (7,6 milyon manat) ayrılıb.
Hesabat dövrü ərzində investisiya layihələrinə və proqramlarına büdcə vəsaitindən 1675 milyon manat xərclənib. Əsas kommunal və nəqliyyat infrastrukturunun inşası və bərpasına 1084 milyon manat yönəldilib. Onlardan elektrik stansiyalarının inşasına 168 milyon manat, suvarma-drenaj infrastrukturunun inşası və bərpasına 69 milyon manat, respublika əhəmiyyətli avtomobil magistrallarının inşasına 731 milyon manat, Bakı metropoliteninin stansiyalarının inşasına və avadanlığın alınmasına 47 milyon manat yönəldilib.
Hesabat dövrü ərzində Azərbaycan Prezidentinin Ehtiyat Fondundan bir sıra vacib dövlət xərclərinin maliyyələşməsinə 7,6 milyon manat, büdcədə əvvəlcədən planlaşdırılmamış tədbirlərin maliyyələşməsinə 65,4 milyon manat ayrılıb.
İyulun 28-nə olan rəsmi məzənnə 0,8041 AZN/USD təşkil edir.
Məqalə müəllifi ilə əlaqə ünvanı: [email protected]
