Azərbaycan, Bakı, 15 avqust / Trend , müxbir İ.Xəlilova /
Beynəlxalq Valyuta Fondu (BVF) Azərbaycan hökuməti ilə "BVF-in yaradılması haqqında" müqavilənin IV maddəsi üzrə hər il müttəmadi olaraq keçirilən konsultasiyaların aparılmasını yenidən təxirə salıb. Bu barədə şənbə günü hökumətdən bildirilib.
"Əvvəlcə BVF-in Yaxın Şərq və Mərkəzi Asiya üzrə departamentinin missiyasının səfəri ilin ortalarına, sonradan isə sentyabra planlaşdırılmışdı. Lakin hazırda məlum olmayan müddətə kimi təxirə salınıb və hətta sentyabr-oktyabr aylarında da gözlənilmir", - hökumətdən bildirilib.
Bu kimi missiyalar çərçivəsində ölkənin rəsmi nümayəndələri, eyni zamanda Mərkəzi Bankın nümayəndələri ilə görüşlər keçirilir. Əsas məqsəd hökumətin ölkə iqtisadiyyatının inkişafı perspektivləri üzrə qısamüddətli və ortamüddətli vəzifələrinin qiymətləndirilməsinin keçirilməsidir. Hələ də davam edən qlobal maliyyə böhranı baxımından fondun missiyası onun Azərbaycan iqtisadiyyatına təsiri üzrə müzakirələr keçirə bilər.
Artıq dörd ildir ki, Azərbaycan hökuməti BVF ilə IV maddə çərçivəsində konsultasiyalar səviyyəsində əməkdaşlıq edir. Buna görə də proqram əsasında əməkdaşlıq perspektivlərinə görüşlər çərçivəsində praktiki olaraq artıq toxunulmur.
Hazırda qlobal maliyyə böhranına baxmayaraq, fondun ölkə tərəfindən yenidən borc götürülməsi şərtləri yoxdur. Bununla əlaqədar olaraq BVF fondun Azərbaycandakı nümayəndələyinin başçısının geri çağırılması və ölkədə ofisin işçi ştatının ixtisar edilməsi haqında qərar verib. BVF-in Bakı ofisi fondun Mərkəzi Asiya və Qafqaz üzrə regional nümayəndəliyi tərəfindən idarə ediləcək.
BVF-in sözügedən qərarı Mərkəzi Asiya və Yaxın Şərq üzrə departamentin başçısı Devid Ouenin iyul ayında Bakıya səfəri zamanı elan olunub. Azərbaycan nümayəndəliyi üçün xərclərin ixtisar edilməsi haqqında qərarı BVF onunla izah etdi ki, Azərbaycan fondun kredit resurslarına ehtiyac duymur. Belə ki, ölkə ödəmə balansında kifayət qədər böyük müsbət saldoya malikdir. Buna görə də qənaət edilmiş vəsaiti BVF fonddan böyük həcmdə kredit alan ölkələrə yönləndirmək niyyətindədir.
Məqalə müəllifi ilə əlaqə ünvanı: [email protected]
