Azərbaycan, Bakı, 17 avqust / Trend , müxbir N.İsmayılova /
Latviyanın investisiya şirkəti Maximus Capital Azərbaycanda rəsmi nümayəndəliyinin açılması imkanını nəzərdən keçirir, bu barədə bazar ertəsi şirkətin özəl kapitalın idarəsi üzrə departamentinin direktoru Dmitri Feldman bildirib.
"Azərbaycan bazarı çox perspektivlidir və nümayəndəliyin açılması bu bazarda uğurlu inkişafın mütləq şərti olacaq", - Feldman bildirib.
Onun sözlərinə əsasən, Azərbaycanda depozitlər üzrə gözəl şərait yaradılıb: Azərbaycan bankları kifayət qədər yüksək dərəcələr təklif edir, xarici maliyyə bazarlarında onların orta gəlirliliyi azərbaycanlı müştərilər üçün o qədər də cəlbedici deyil.
"Digər tərəfdən mən əminəm ki, investisiya portfelinin diversifikasiyası məqsədilə beynəlxalq maliyyə bazarları Azərbaycandakı həm özəl, həm də institusional müştərilə üçün maraq kəsb edə bilər", Feldman bildirib.
Onun sözlərinə əsasən, Maximus Capital-ın Azərbaycanın özəl və koporativ müştərilərinə təklif etdiyi xidmətlərə aktivlərin məxfi idarəsi, fərdi portfellərin tərtib edilməsi, əsas yatırım məbləğinin qaytarılması zəmanti ilə investisiya strategiyalarının işlənib hazırlanması, beynəlxalq maliyyə bazarlarında broker xidmətləri, eyni zamanda Forex bazarı, səhmlər, fyuçers, istiqraz və digər maliyyə alətləri ilə ticarət etmək imkanları aiddir.
Maximus Capital Avropa İttifaqının tələbləri əsasında lisenziyalaşdırılan və uzunmüddətli iş təcrübəsinə və maliyyə bazarlarında təmiz şöhrətə malik komandanı birləşdirən müstəqil investisiya şirkətidir. Maximus Capital baş menecerləri və İdarə Heyətinin üzvləri dünyanın böyük və daha çox nüfuzlu banklarında və maliyyə qruplarında (ABŞ, Baltik ölkələri, Rusiya, İsveçrə ) əsas vəzifələri tutublar. Maximus Capital Baltik və MDB ölkələri bazarlarında uğurla fəaliyyət aparır.
Məqalə müəllifi ilə əlaqə ünvanı: [email protected]
