Azərbaycan, Bakı, 31 avqust / Trend , müxbir İ.Xəlilova /
2009-cu ilin yanvar-iyulunda dövlət büdcəsinin gəlir hissəsinə faktiki daxilolmalar ötən ilin müvafiq dövrü ilə müqayisədə 5,5 faiz azalaraq 5708,7 milyon manat (ÜMD-dən 32,9 faiz) təşkil edib. Bu barədə bazar ertəsi hökumətdən deyilib. Dövlət xərcləri 3,3 faiz artaraq 5276 milyon manat (ÜDM-dən 30,4 faiz) təşkil edib. Büdcə profisiti 432,7 milyon manat və ya ÜDM-dən 2,5 faiz təşkil edib.
Daxilolmaların strukturunda 35,2 faiz (2011,7 milyon manat) Vergilər Nazirliyi hesabına təmin olunub. Vergi yığımı üzrə tutulmalar ötən ilin müvafiq dövrü ilə müqayisədə 46,4 faiz azalıb. Gömrük vergi və rüsumlarından gəlirlər proqnozun 97,8 faiz yerinə yetirilməsi ilə 717,7 milyon manat (12,6 faizlik xüsusi çəki ilə) təşkil edib.
Hesabat dövrü ərzində ƏDV-dən 1162,8 milyon manat daxil olub. Bu da ümumi gəlirin 20,4 faizini təşkil edir. Mənfəət vergisi üzrə 717,2 milyon manat (12,6 faiz), gəlir vergisi üzrə 345,3 milyon manat (6 faiz), aksiz vergisi üzrə 143,2 milyon manat (2,5 faiz), əmlak vergisi üzrə 45,6 milyon manat (0,8 faiz), yeraltı sərvətlər vergisi üzrə 51,8 milyon manat (0,9 faiz), xarici iqtisadi fəaliyyət üzrə vergilərdən isə 138,4 milyon manat (2,4 faiz) daxil olub.
Əhalinin sosial təminatına və müdafiəsinə büdcə vəsaitindən yeddi ay ərzində 617,9 milyon manat (11,7 faizlik xüsusi çəki ilə), təhsilə 688,3 milyon manat (13 faiz ), səhiyyəyə 194,7 milyon manat (3,7 faiz), prokurorluq, təhlükəsizlik, hüquq-mühafizə, məhkəmə hakimiyyəti orqanlarının təminatına 328,4 milyon manat (6,2 faiz), iqtisadiyyata investisiya qoyuluşuna 2264,8 milyon manat (42,9 faiz), mənzil kommunal xərclərinə 99,8 milyon manat (1,9 faiz), kənd, meşə təsərrüfatına, eləcə də balıqçılığa 156,4 milyon manat (3 faiz), nəqliyyat və rabitəyə 37,5 milyon manat (0,7 faiz) xərclənib. Dövlət xərclərindən 31,5 faiz (1662,6 milyon manat) əhalinin əmək haqqılarının, pensiya və müavinətlərinin ödəmələrinə sərf edilib.
Avqustun 31-nə olan rəsmi məzənnə 0,8039 AZN/USD təşkil edir.
Məqalə müəllifi ilə əlaqə ünvanı: [email protected]