Azərbaycan, Bakı, 07 sentyabr / Trend , müxbir E.İsmayılov /
Azərbaycan, Gürcüstan və Türkiyəni birləşdirən Bakı-Tbilisi-Qars dəmir yolunun inşası layihəsinin realizəsində heç bir problem müşahidə olunmur. Bu barədə bazar ertəsi "Azərbaycan Dəmir Yolları" QSC-nin baş mühəndisi Qurban Nəzirov dəmir yolunun inşasının yubanması və onun istismara planlaşdırıldığı kimi, 2011-ci ildə deyil, 2012-ci ildə verilməsi barədə fikirləri şərh edərkən deyib.
"Dəmir yolunun inşasında problem yoxdur və əvvəldən planlaşdırıldığı kimi, 2011-ci ildə idtifadəyə veriləcək", - Nəzirov deyib.
Dəmir yolunun Gürcüstan hissəsinin tikintisi üçün Azərbaycan Respublikası Dövlət Neft Fondunun (ARDNF) ayırdığı güzəştli kredit çərçivəsində 27,1 milyon manat ayrılıb, bir müddət əvvəl ARDNF rəhbəri Şahmar Mövsümov deyib.
Azərbaycan Bakı-Tbilisi-Qars marşrutunun Gürcüstan hissəsinin bərpasına Neft Fondundu 200 milyon dollar ayırmağı planlaşdırır. "Marabda-Qars dəmir yolu" MMC-nin cari təminatı üçün əmək haqlarını və dəftərxana xərclərini ödəmək məqsədilə nəzərdə tutulmuş 280 min dollardan çox vəsait verilib.
20,7 milyon manatlıq ilk tranş 2007-ci ildə ayrılıb. 2008-ci ildə ARDNF Gürcüstan ərazisində Bakı-Tbilisi-Qars dəmir yolunun inşası layihəsinin maliyyələşdirilməsinə 5,3 milyon manat yönəldib.
Bakı-Tbilisi-Qars layihəsi çərçivəsində dəmir yolu magistralının yeni 105 km-lik qolunun tikintisi planlaşdırılır. Bunun 76 km-i Turkiyə, 29 km-i isə Gürcüstan ərazisindən keçəcək. Bundan əlavə, nəqletmə gücünü ildə 15 mln. ton yükə çatdırmaq üçün Gürcüstanda 183 km-lik Axalkalaki - Marabda - Tbilisi dəmir yolunun 183 km-lik hissəsi yenidən qurulacaq. Axalkalakidə Gürcüstanda mövcud olan dəmir yolu xətlərinin Avropa standartlarına uyğunlaşdırılması üzrə məntəqələrin tikilməsi də planlaşdırılır.
Sentyabrın 7-nə olan rəsmi məzənnə 0,8038 AZN/USD təşkil edir.
Məqalə müəllifi ilə əlaqə ünvanı: [email protected]