Azərbaycan, Bakı, 07 oktyabr / Trend , Ü.İsmayılova/
"Başak İnam" Azərbaycan-Türkiyə sığorta şirkəti avtomatlaşdırılmış idarə sisteminə keçid üzrə işləri başa çatdırmaq üzrədir. Bu barədə şirkətin idarə heyətinin sədri Orxan Hüseynov çərşənbə günü deyib.
"Yeni proqram təminatının tam tətbiqi ilin sonunadək başa çatdırılacaq və artıq yeni ildən şirkətin əməliyyat fəaliyyəti yeni proqram vasitəsilə idarə ediləcək", - Hüseynov deyib.
Onun sözlərinə görə, şirkət yeni sistemə keçməyi iyun ayına planlaşdırsa da, proqram tətbiqi ilə əlaqəli dəyişikliklərin baş verməsi səbəbindən tətbiq müddəti ilin sonunadək uzanıb.
Yeni proqram şirkətə sığorta müqaviləsinin bağlanması zamanı kənar müdaxilələr olmadan hər bir prosesi izləmək imkanı verir. "Yeni proqramın tətbiq edilməsindən sonra ola bilsin ki, "Başak İnam" şirkətinin əməkdaşlarının sayı iki dəfə azalsın", - Hüseynov deyib. Hazırda şirkətdə 45 əməkdaş fəaliyyət göstərir.
Onun sözlərinə görə, bu dövr ərzində proqram tətbiqi üzərində işləyən işçilərin işdən çıxarılması təbii xarakter daşıyır və bu ixtisar deyil.
"Bu prosesdə fəaliyyət göstərən bir neçə əməkdaş satış şöbəsinə göndəriləcək. Bu vəzifənin öhdəsindən gələ bilməyənlər isə işdən çıxarılacaq", - o deyib.
"Başak İnam" birgə sığorta şirkəti 1996-cı ildən fəaliyyət göstərir. Şirkət 31 növdə sığorta xidməti göstərir. May ayından şirkətin nizmanamə kapitalı 2 milyonadək artıb.
Oktyabrın 07-nə olan rəsmi məzənnə 0,8033 AZN/USD təşkil edir.
Məqalə müəllifi ilə əlaqə ünvanı: [email protected]
