Azərbaycan, Bakı, 31 may /Trend, müxbir T.Cəfərov/
İran Milli Bankının Azərbaycanda fəaliyyətini genişləndirmək və iranlı tacirlər və investorlara daha yaxşı xidmət göstərmək məqsədilə bankın Azərbaycanın digər şəhərlərində, o cümlədən Astara və Biləsuvarda şöbələrinin açılması nəzərdə tutulub. Bunu Bakıda səfərdə olan İran Milli Bankının rəyasət heyətinin sədri və icraçı direktoru Mahmud Rza Xavəri bildirib. Bu barədə IRNA xəbər agentliyi məlumat verib.
Xavəri əlavə edib ki, bu məsələ ilə bağlı ilkin razılaşma əldə olunub.
O bildirib ki, İran Milli Bankı 85 ildir fəaliyyət göstərir və bankda 50 min nəfərdən çox təcrübəli işçi çalışır. "Ötən ilə ərzində bankın kapitalında İrana qoyulmuş sanksiyalara rəğmən 14 faiz artım olub və 60 milyard dollara çatıb", - Xavəri deyib
İran Milli Bankında 18 milyon nəfər ölkənin daxilində və xaricində yerləşən 3500 şöbədə hesab nömrəsi açıb. 44 milyard dollar həcmində əhalinin əmanət pulları qəbul edilib və 40 milyard dollar dəyərində də kreditlər ayrılıb.
Bu banka qarşı sanksiyalar yalnız Tehrandakı baş ofisə deyil, həm də Azərbaycanda, İraqda, Çində, Fransada, Almaniyada, Omanda və BƏƏ-dəki filiallara da aid edilib.
Bundan başqa sanksiyalar bankın törəmə strukturlarına tətbiq olunub - Bank Melli Iran QSC (Moskva), Melli Bank PLC (London), Tehrandakı Bank Cargoshaee və Kabuldakı Arian Bank. Azərbaycanda Bank Melli-dən başqa digər İran bankları fəaliyyət göstərmir.
Sanksiyalara görə ABŞ şirkətlərinin və fiziki şəxslərinin bu İran bankları və təşkilatları ilə olan istənilən əməliyyatları qadağan olunur. Onların ABŞ-ın yurisdiksiyası altında olan bütün aktivləri dondurulacaq.
2009-cu ilin yekunlarına görə, ABŞ sərmayəsinə malik şirkətlərin xüsusi çəkisi 5,7%, İran sərmayəsinə malik şirkətlərin xüsusi çəkisi isə 5,9%-dir. Amma sərmayənin həcminə görə ABŞ qabaqdadır və onların xüsusi çəkisi 14,7%-dir (216,769 milyon manat). İranın sərmayə qoyuluşları isə heç 1 faizə də çatmır.