Azərbaycan, Bakı, 8 iyul /Trend, müxbir Ü.İsmayılova/
Mayda Bakıda daşınmaz əmlak bazarında qiymətlər 1,1 faiz azalaraq bir kvadratmetr üçün 811 dollaradək düşüb ki, bu da ötən ilin may ayına nisbətən 15,3 faiz azdır.
"Son aylar bazarda qiymətlərin cüzi azalması templəri davam edir. Bazarda qiymətlərin artıq reallığa yaxın olmasına baxmayaraq, tikinti şirkətləri real qiymətləri tədricən qəbul etməyə başlayırlar", - "MBA Group Consulting" şirkətinin ekspertləri hesab edirlər.
İlkin mənzillərin portfeli strukturunda Bakı şəhərinin birinci zonasının payı bu dövrdə 10,5 faiz, ikinci zona - 42,4 faiz, üçüncü zona - 30,5 faiz, dördüncü zona isə 22,8 faiz olub.
Mayda ilkin mənzil bazarı portfeli yaşayış mənzillərinin (62,2 faiz), villaların (3,7 faiz), fərdi evlərin (13,8 faiz), kommersiya obyektlərinin (20,3 faiz) hesabına formalaşıb.
Ekspertlərin fikrincə, ilkin mənzil bazarında aktivliyin nisbi artımı qiymətlərin tədricən sabitləşməsinə gətirib çıxarır, ipoteka kreditləşməsinin davam etdirilməsi qiymətlərdə düzəliş edən tikinti şirkətlərinə inamı artırır.
Tikinti şirkətləri də müvəqqəti böhranlı vəziyyəti nəzərə alaraq qiymətləri dəyişməyə cəhd göstərirlər, eləcə də qiymətlərin maya dəyərinə yaxınlaşması xırda şirkətlərin bazardan getməsinə səbəb olur.
Təşkilatın ekspertlərinin fikrincə, bazarda yaranmış vəziyyət onu deməyə əsas verir ki, bazarda böhranlı vəziyyət davam edir və hələ 2010-cu ilin sonunadək davam edəcək.
