Azərbaycan, Bakı, 19 iyul /Trend, müxbir İ.Xəlilova/
Optimist proqnozlara görə, Azərbaycan və Almaniya arasında 2010-cu ildə mal dövriyyəsi 30-40 faizədək artaraq iki milyard dolları ötə bilər. Bu barədə bazar ertəsi Bakıda olan Almaniyanın İqtisadiyyat və Texnologiyalar Federal Nazirliyinin MDB ölkələri ilə iqtisadi əməkdaşlıq departamentinin rəhbəri Andreas Noyman bildirib.
"Belə proqnozlar Azərbaycanda alıcılıq qabiliyyətinin artmasına əsaslanır. Tərəfimizdən modernləşdirmə üzrə təkliflər irəli sürülüb və ümid edirəm ki, növbəti biznes forumunun yekunları üzrə tərəfdaşlıq əlaqələri qurulacaq. Biz bilirik ki, Azərbaycan başqa ölkələrdən də təkilflər alır, lakin biz güclü və zəif tərəfləri bilirik və indi onlar üzərində işləyirik", - Noyman qeyd edib.
Hazırkı səfər çərçivəsində Almaniya şirkətləri neft-qaz sektoruna avadanlıq təchizatı üzrə təkliflə çıxış edirlər. Hazırda Almaniya həm enerji effektivliyinin artırılması sahəsində, həm də yenidən qurulan enerji mənbələrinin lideridir və bununla əlaqədar alman şirkətləri konkret təkliflərlə çıxış edirlər.
"Azərbaycan iqtisadiyyatında kənd təsərrüfatı sahəsi timsalında modernləşdirməni tələb edən sahələr mövcuddur. Alman şirkətlərinin nümayəndələri kənd təsərrüfatında əməyin daha yaxşı təşkili üçün öz avadanlıqlarını təklif edirlər", - Noyman sözünü tamamlayıb.
