Azərbaycan, Bakı, 27 iyul /Trend, müxbir H.Vəliyev/
Abşeron yarımadasının Saray qəsəbəsində yerləşən "Azəri-Şah" MMC-də aparılan yoxlamalar zamanı Masazır duz gölündən götürülən iki ton duz ehtiyatı aşkar edilib. Bu barədə Standartlaşdırma, Metrologiya və Patent üzrə Dövlət Komitəsinin məlumatında deyilir.
Müəyyən olunub ki, yodlaşdırılmış duz istehsalı üçün lazımi şərait olmadığı halda, müəssisəyə gətirilmiş duz emal olunaraq qablaşdırılıb.
Qüvvədə olan standartın tələblərinə uyğun olaraq, yodlaşdırılmış duz istehsalı prosesində istehsalçı tərəfindən hər yeddi saatdan bir həll olunmamış qalıq kütləsinin həcminə və yodun miqdarına nəzarət həyata keçirilməlidir.
Eləcə də yeddi gündə bir dəfədən az olmayaraq kalsium (Ca), maqnium (Mg) və natrium-xlorid (NaCl) kütləsinin həcmləri üzərində nəzarət həyata keçirmək lazımdır.
İstehsal olunan məhsulun tərkibinin analizini aparmaq üçün laboratoriya olmasa da, məhsul istehsal olunub və satışa çıxarılıb. "Azəri-Şah" MMC qablaşdırmada məhsulun yararlılıq müddətini bir il göstərib. Halbuki yodlaşdırılmış duz üçün qüvvədə olan AZS 280-2007 standartına görə yararlılıq müddəti 9 aydır. Eləcə də məhsulun markalanması zamanı qüvvəsini itirmiş Az 00900003-17-2003 normativ sənədlərdən istifadə olunub.
Müəssisədə araşdırma davam etdirilir.
