Azərbaycan, Bakı, 29 iyul /Trend, müxbir E.İsmayılov/
"Azersun Holding" 2011-ci ilin martında kartonun təkrar emalı üzrə yeni zavodun istismara verilməsini planlaşdırır. Bu barədə cümə axşamı "Azersun Holding"in rəhbəri Abdulbari Gözəl bildirib. Əvvəllər müəssisənin 2010-cu ilin ikinci rübündə istismara verilməsi barədə bildirilmişdi.
"Bunun nəticəsində müəssisə ölkənin kağıza olan ehtiyacının ödənilməsi ilə yanaşı, ətraf mühitin çirkləndirilməsinin qarşısının alınmasında mühüm rol oynayacaq. Yeni zavod təxminən gələn ilin martından fəaliyyətə başlayacaq", - Gözəl deyib.
Yeni müəssisənin inşasına 30 milyon avronun yatırılması gözlənilir. Müəssisə Sumqayıtda yaradılan sənaye şəhərciyinin ərazisində yerləşəcək.
Fabrik gündə 200 ton, ildə isə 60 min ton istifadə kağızını emal etmək gücünə malik olacaq.
Müəssisənin kağız tullantılarının təkrar emalı üzrə potensialı yalnız Azərbaycanın deyil, eləcə də Gürcüstan, Türkmənistan və Dağıstanın da kağıza olan tələbatını təmin etməyə imkan verəcək. İstehsalatın 30 faizi sayəsində ölkənin tələbatı ödəniləcək, kağızın 70 faizi isə qonşu ölkələrə ixrac ediləcək.
Bu fabrikin işə başlaması ilə kompleksin fəaliyyətinə kağız sənayesi də əlavə olunacaq, belə ki, hələ 1996-cı ildə holdinqin investisiyaları vasitəsilə Xırdalanda karton fabriki qurulmuşdu.
"Azersun Holding" MMC 1992-ci ildə yaradılıb. Holdinqin fəaliyyət sahələri çay və bitki yağının emalı və qablaşdırılması, ticarət və distribusiya, tikinti, bank işi, sığorta, karton-kağız məhsullarının, ət və tərəvəz konservlərinin istehsalı, yüklərin daşınması və saxlanılmasıdır.