Azərbaycan, Bakı, 11 avqust /Trend, müxbir İ.Xəlilova/
Azərbaycan Mərkəzi Bankının (AMB) proqnozlarına görə, 2010-cu ilin sonunadək orta illik inflyasiya birrəqəmli səviyyədə gözlənilir. Bu barədə çərşənbə günü AMB-dən bildirilib.
"Bu proqnozlar 2010-cu ilin birinci yarım ilində cərəyan edən proseslərin analizinə, eləcə də qlobal və daxili mühitdəki gözləntilərə əsaslanır", - Mərkəzi Bankdan bildiriblər. - "İnflyasiya prosesləri aktivləşəcəyi halda, AMB öz səlahiyyətləri çərçivəsində lazımi dezinflyasiya tədbirləri görəcək".
Cari ilin iyun ayında inflyasiya ötən ilin dekabr ayı ilə müqayisədə 2,1 faiz, 2009-cu ilin iyununa nisbətdə 6,1 faiz təşkil edib. Yarım ilin son iki ayında mövsümi deflyasiya müşahidə olunub. Orta illik inflyasiya 4,9 faiz təşkil edib ki, bunun 2,6 faizi ərzaq mallarının bahalaşması nəticəsində təmin olunub. Orta illik inflyasiyaya qeyri-ərzaq mallarının 1,4 faiz, xidmətlərin 0,9 faiz bahalaşması da artan təsir göstərib.
AMB-nin apardığı ekonomometrik hesablamalar üzrə aydın olub ki, ilin birinci yarısında orta illik inflyasiya 43,3 faiz xarici amillər, 27,4 faiz nominal effektiv məzənnə, 29 faiz pul kütləsi (M1), 0,3 faiz isə mövsümi amillərin hesabına formalaşıb.
İyunda baza inflyasiyası ilin əvvəlinə nisbətən 0,8 faiz, ötən ilin müvafiq ayına nisbətən isə 3,4 faiz təşkil edib. Yarım il ərzində inflyasiyanın orta illik bazası 2,4 faiz təşkil edib.