"Moody's" beynəlxalq reytinq agentliyi Azərbaycan bankları tərəfindən 2010-cu ilin yekunları üzrə kreditləşdirmənin həcmlərinin 10-15 faiz artırılacağını gözləyir. Bu barədə Trend-ə daxil olan "Moody's Investors Service Ltd"nin hesabatında deyilir.
"Moody's" reytinqinə malik banklar tərəfindən ölkə iqtisadiyyatının kreditləşdirilməsi 2009-cu ildə 5,4 faiz artıb. Bu, əsasən dövlət bankı olan Azərbaycan Beynəlxalq Bankı (ABB) tərəfindən kreditləşdirmənin genişləndirilməsi hesabına olub", - hesabatda deyilir.
Agentliyin fikrincə, ABB dünya maliyyə böhranı şəraitində ölkə iqtisadiyyatının dəstəklənməsində getdikcə daha önəmli rol oynayır.
"2009-cu ildə özəl banklarda kreditləşmədə artım zəifləyir. 2010-cu ildə biz kreditləşdirmədə artımın 10-15 faizə yaxın artacağını gözləyirik və bu qiymət özəl banklar tərəfindən kreditləşdirmədə artımın sürətləndirilməsini tələb edir", - hesabatda bildirilir.
Bu gün beş bank "Moody's" agentliyinin reytinqinə malikdir: Kapital Bank, Bank Respublika, Unibank, Texnikabank, Azərbaycan Beynəlxalq Bankı.