...

Azərbaycanda DB-nin kənd təsərrüfatı layihəsinin ikinci fazası çərçivəsində 170-ə yaxın mikrolayihə həyata keçirilib

Biznes və iqtisadiyyat xəbərləri Materials 14 Sentyabr 2010 15:38 (UTC +04:00)

Azərbaycan, Bakı, 14 sentyabr /Trend, müxbir N.İsmayılova/

Bu günədək Azərbaycan hökuməti və Dünya Bankının (DB) reallaşdırdığı "Azərbaycanın kənd sərmayələri" layihəsinin ikinci fazası çərçivəsində (AzRIP) 170-ə yaxın mikrolayihə həyata keçirilib. Bu barədə çərşənbə axşamı layihənin direktoru Sübhan Əsgərov bildirib.

"Bü günədək layihənin ikinci fazası çərçivəsində ümumi məbləği altı milyon dollar olan 170-ə yaxın mikrolayihə həyata keçirilib", - Əsgərov bildirib.

Birinci mərhələ çərçivəsində ümumilikdə 21,1 milyon dollar qiyməti olan 340 layihə reallaşdırılıb. Dəyəri 50-60 min dolları ötən layihə DB tərəfindən maliyyələşməyə razılıq alındıqdan sonra həyata keçiriləcək. Dəyəri 50-60 min dollardan yüksək olmayan layihələr isə birbaşa maliyyələşdiriləcək.

Azərbaycan hökuməti və DB arasında "Azərbaycan kənd sərmayələri" (AzRIP) layihəsinin 21,5 milyon dollar həcmində əlavə maliyyələşdirilməsi üzrə kredit müqaviləsinin imzalanması aprel ayında baş tutub.

Əlavə maliyyələşdirmə layihənin əhatə ərazisinin genişlənməsi səbəbindən həyata keçirilib. Müvafiq olaraq layihənin realizə müddəti üç il uzadılıb. Layihənin 2012-ci ilin martınadək başa çatdırılması planlaşdırılıb.

DB artıq 2005-ci ildən həyata keçirilən layihənin genişləndirilməsi üçün 15 milyon dollar vəsait ayırıb. Azərbaycan hökumətinin payı 9 milyon dollar təşkil edəcək.

AzRIP layihəsinin həyata keçirilməsinə dair kredit müqaviləsi 2004-cü il sentyabrın 23-də imzalanıb və 2004-cü il dekabrın 29-da qüvvəyə minib. Layihənin ümumi dəyəri 21,1 milyon dollar təşkil edir ki, bunun da 15 milyon dolları Beynəlxalq İnkişaf Assosiasiyasının, 3,3 milyon dolları Yaponiya hökumətinin qrantının payına, qalan hissəsi isə hökumətin payına (1,250 milyon dollar) düşür. 300-400 icma layihəsini əhatə etməli olan layihənin 2009-cu ilin mart ayınadək başa çatdırılması nəzərdə tutulurdu. AzRIP layihəsi ilkin olaraq Naxçıvan MR, Şirvan və Muğan-Salyan regionlarının 21 rayonunu əhatə edib.

Sentyabrın 14-nə olan rəsmi məzənnə 0,8037 AZN/USD təşkil edir.

Xəbər lenti

Xəbər lenti