Azərbaycan, Bakı, 23 sentyabr /Trend, müxbir N.İsmayılova/
Beynəlxalq Maliyyə Korporasiyası (BMK) Azərbaycanda müasir korporativ idarəetmə standartlarının tətbiqinə texniki yardım Proqramının (ACGP) ikinci mərhələsi çərçivəsində pilot şirkətlərin sayının artırılmasına ümid edir. Bu barədə cümə axşamı ACGP layihəsinin rəhbəri Karolina Brayt deyib.
"Biz bank olmayan özəl sektora əsaslanaraq öz korporativ idarəetməsini yaxşılaşdırmağa çalışan şirkətlər axtarırıq", - Brayt deyib.
İkinci mərhələ çərçivəsində artıq dörd pilot təşkilat seçilib - "TuranBank", "CredAgro" bank olmayan kredit təşkilatı, "A-Group" sığorta şirkəti və "AzMeCo" şirkəti.
Proqramın birinci mərhələsində iştirak ikincidən fərqli olaraq ödənişsiz olub. Belə dəyişikliyə səbəb özəl şirkət və bankların ACGP proqramında daha məsuliyyətli iştirakını təmin etməklə bağlıdır.
İsveçrənin İqtisadi Əməkdaşlıq üzrə Dövlət Katibliyi (SECO) layihənin ikinci mərhələsinin maliyyələşdirilməsini dörd milyon dollardan çox məbləğ sərf edərək öz üzərinə götürüb.
Korporativ idarəetmə layihəsi İqtisadi Əməkdaşlıq və İnkişaf Təşkilatının (OECD) normalarına müvafiq olaraq korporativ idarəetmə standartlarının tətbiqinə imkan verir.
Beynəlxalq Maliyyə Korporasiyasınını təşəbbüsü ilə SECO tərəfindən maliyyələşdirilən layihənin rəsmi açılışı 2005-ci il yanvarın 26-da olub. Layihənin birinci mərhələsinin həyata keçirilməsi 2,1 milyon dollar büdcə ilə üç ilə nəzərdə tutulub.