Azərbaycan, Bakı, 23 sentyabr /Trend, müxbir İ.Xəlilova/
Dünya Bankının (DB) Avropa və Mərkəzi Asiya ölkələrindəki nəqliyyat sektoru üzrə meneceri Henri Kerrali Azərbaycanda reallaşdırılan yol layihələrinin icmalı və üçüncü magistral avtomobil yolunun yenidən qurulması üzrə yeni layihənin başlaması ilə əlaqədar Bakıya ikigünlük səfərə gəlib. Bu barədə DB-nin Bakı nümayəndəliyindən bildiriblər.
"Cümə günü üçüncü magistral avtomobil yolunun yenidən qurulmasına başlanması ilə əlaqədar seminar keçiriləcək", - nümayəndəlikdən deyiblər.
Bakı-Şamaxı-Muğan avtomobil yolunun ikizolaqlıdan dördzolaqlıyadək genişləndirilməsini nəzərdə tutan kredit sazişi 2010-cu il avqustun 11-də Bakıda imzalanıb.
Bankın bu layihənin maliyyələşdirilməsinə ayırdığı kredit resurslarından 70 milyon dollar 2010-cu maliyyə ilində Azərbaycan üçün Beynəlxalq İnkişaf Assosiasiyasının (BİA DB qrupuna daxildir) kvotaları hesabına güzəştli şərtlərlə nəzərdə tutulub, 171,6 milyon dollar Beynəlxalq Yenidənqurma və İnkişaf Bankının (BYİB) xətti ilə ayrılacaq. Layihənin ümumi dəyəri 356,15 milyon dollar təşkil edir. Maliyyələşmənin yerdə qalan digər hissəsi müvafiq olaraq layihədə dövlətin iştirak payı sayəsində həyata keçiriləcək.
BİA-nın xətti ilə kredit resursları 10 illik güzəştli dövr olmaqla 20 illliyə, BYİB xətti ilə isə ödənişdən dördillik möhlətlə 17 illiyə ayrılıb.
Bakı-Şamaxı-Muğan yolunun uzunluğu 122 kilometr təşkil edir ki, onun da 101 kilometri müzakirə olunan layihə çərçivəsində tikiləcək, yerdə qalan hissə isə artıq tikilib.
Azərbaycan 1992-ci ildən DB-nin üzvüdür. Bankla əməkdaşlıq ərzində ölkəyə 47 layihənin maliyyələşdirilməsi üçün 2,5 milyard həcmində kredit ayrılıb. 2008-ci ildə bank tərəfindən 13 layihənin maliyyələşdirilməsinə 1,251 milyard dollar yönəldilib. Strategiyanın son iki ilində (2009-2010-cu illər) DB ölkəyə bir milyard dollardan çox vəsait ayırmağa hazır olduğunu bildirib. Bu vəsait artıq kommersiya şərtləri ilə - Beynəlxalq Yenidənqurma və İnkişaf Bankının xətti ilə verilməli idi. Lakin bank indiyədək Azərbaycanı paralel olaraq güzəştli şərtlərlə maliyyələşdirir.
Bu gün ölkədəki magistral yolların uzunluğu 1871 kilometr, respublika əhəmiyyətli yolların uzunluğu 2706 kilometr, yerli əhəmiyyətli yollar 14 222 kilometr təşkil edir. Magistral yolların yalnız 45 faizi, respublika əhəmiyyətli yolların 30 faizi və yerli əhəmiyyətli yolların 16 faizi yaxşı vəziyyətdədir.
