Azərbaycan, Bakı, 7 dekabr /Trend, müxbir Ü.İsmayılova/
Azərbaycan Turizm Assosiasiyası (ATA) dekabrın 9-da Qazaxıstan Turizm Assosiasiyası ilə qarşılıqlı anlaşma və əməkdaşlıq haqqında memorandumu imzalamağa hazırlaşır. Bu barədə çərşənbə axşamı ATA-nın rəhbəri Nahid Bağırov deyib.
"Memorandum hər iki strukturun ölkənin turizm potensialının birgə inkişafı üzrə əməkdaşlığını təmin edəcək", - Bağırov bildirib.
Qarşılıqlı anlaşma və əməkdaşlıq haqqında memorandum təşkilatlar arasında ikitərəfli əlaqələrin, informasiya və müasir təcrübə mübadiləsinin yaxşılaşdırılması məqsədilə qanunvericiliyin prinsiplərinə əsaslanaraq həyata keçiriləcək gələcək əməkdaşlığı nəzərdə tutur. Tanışlıq səfərlərinin təşkili, yeni turizm marşrutlarının öyrənilməsi, yeni turizm məhsullarının təqdimatının təşkili, hər iki ölkənin maraqlı firma və təşkilatlarının əməkdaşlığa cəlb edilməsi, turistlərin qəbulu və xidmətlərin göstərilməsi üzrə yüksəkkeyfiyyətli turizm məhsullarına və servisə malik turizm şirkətlərinin və təşkilatların müvəkkil qismində seçilməsi nəzərdə tutulur.
Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb, 2010-cu ilin oktyabrında isə o, ölkənin Mehmanxanalar Assosiasiyası ilə birləşib. Assosiasiyaya 58 üzv daxildir.
