Azərbaycan, Bakı, 13 dekabr /Trend, müxbir N.İsmayılova/
"Texnikabank"ın 2010-cu il dekabrın 1-nə olan aktivləri noyabrda 3,5 faiz artaraq 486,53 milyon manat təşkil edib. Bu barədə bazar ertəsi bankdan məlumat verilib. Gəlirlər aktivlər üzrə 1,98 faiz, kapital üzrə isə 14,93 faiz təşkil edib.
Bankın nizamnamə kapitalı 53,69 milyon manat, ümumi kapital isə 64,75 milyon manat təşkil edib.
Bankın dekabrın 1-nə olan depozit portfeli noyabrda 7,9 faiz artaraq 239,92 milyon manata çatıb, o cümlədən fiziki şəxslərin əmanətləri 165,02 milyon manat təşkil edib. Bankın ümumi öhdəliyi 405,78 milyon manat səviyyəsindədir.
Problemli kreditlərin payının (ödəniş vaxtı 90 gündən çox gecikən) 4,63 faizə (15,74 milyon manat) çatdığı bankın kredit portfeli 0,8 faiz artaraq 339,85 milyon manat təşkil edib. "Texnikabank" 27,77 milyon manat istehlak krediti verib.
Hesabat dövrü ərzində bankın gəlirləri 57,47 milyon manat, o cümlədən faizli gəlirlər 44,72 milyon manat, faizsiz gəlirlər isə 12,75 milyon manat təşkil edib. Bankın xərcləri 48,17 milyon manat olub.
Bankın xalis gəliri dekabrın 1-nə 9,24 milyon manat təşkil edib.
Dekabrın əvvəlində aktiv plastik kartların sayı 47 907 ədəd təşkil edib. "Texnikabank" ölkə üzrə 60 bankomat, 150 POS-terminal quraşdırıb. Bankın 35 filialı və beş şöbəsi var.
"Texnikabank" ölkənin bank bazarında 1993-cü ildən fəaliyyət göstərir, 2007-ci ilədək 100 faizli Azərbaycan bankı olub. Bu gün bankın majoritar səhmdarı kimi "World Wines" şirkəti çıxış edir. Şirkət bankın səhmlərinin 75 faizinə sahibdir. Bankın Müşahidə Şurasının sədri Etibar Əliyev səhmlərin 15 faizinə, ABŞ-ın "Kazimir Investment Caspian Fund" holdinqi isə səhmlərin 10 faizinə nəzarət edir.
Dekabrın 13-nə olan rəsmi məzənnə 0,7991 AZN/USD təşkil edir.