Azərbaycan, Bakı, 9 fevral / Trend, müxbir İ.Xəlilova /
2010-cu ilin yekunları üzrə ABB-nin xalis gəliri 8 milyon 681,84 min manat təşkil edib. Bu barədə çərşənbə günü bankdan məlumat verilib. Ümumi gəlirlər 99,206 milyon manat, xərclər 63,961 milyon manat olub.
Ötən ili ABB 5 milyon 527,92 min manatlı aktivlərlə başa vurub ki, bu da 2009-cu ilin analoji göstəricisindən 8,99 faiz çoxdur.
Bankın kredit portfeli 3,59 faiz - 3760,812 milyon manatadək azalıb. ABB istehlak kreditləşməsinə 374,618 milyon manat yönəldib.
Hüquqi və fiziki şəxslərin depozitlərinin ümumi həcmi (bankların və digər maliyyə qurumlarının depozitləri nəzərə alınmadan) 1972,78 milyon manat təşkil edib. Fiziki şəxslərin əmanətləri hesabat dövründə 716,19 milyon manat təşkil edərək il ərzində 33,62 faiz artıb.
2011-ci il yanvarın 1-nə ABB-nın ümumi öhdəlikləri 9,5 faizlik artımla 4 milyon 862,407 min manat təşkil edib.
Beynəlxalq Bankın ümumi kapitalı 509,027 milyon manat, eləcə də nizamnamə kapitalı 240 milyon manat səviyyəsində formalaşıb.
Xalis mənfəətin bankın aktivləri (ROA) üzrə orta qalığa nisbəti 0,94 faiz təşkil edib. Xalis gəlirlərin balans kapitalı (ROE) üzrə orta qalığa nisbəti isə 7,72 faiz təşkil edib.
2011-ci il yanvarın 1-nə olan vəziyyətə görə, ABB 37 filial və 40 şöbəyə malikdir. Hazırda bank 605 bankomat və 2932 POS-terminal quraşdırıb. 2010-cu ilin yekunları üzrə bankın aktiv plastik kartlarının sayı 1 762 029 ədəd olub.
Fevralın 9-na olan rəsmi məzənnə 0, 7958 AZN/USD təşkil edir.
