Azərbaycan, Bakı, 21 fevral /Trend, müxbir Ü.İsmayılova/
Həyat sığortası sahəsində ixtisaslaşan Azərbaycanın sığorta şirkətləri istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta bazarının potensialını ildə 30-40 milyon manat səviyyəsində qiymətləndirirlər.
"2011-ci ildə şirkətlərin bu potensialı bütünlüklə əhatə edə bilməyəcəkləri mümkündür, belə ki, müəyyən problemlər var. Onlar qanunun tətbiqi ilə əlaqədardır. Belə ki, bəzi şirkətlər ikili mühasibat aparırlar, yəni real əməkhaqqını qeyri-rəsmi formada rəsmiləşdirirlər. Lakin digər problemlər də var", - Trend-ə "Atəşgah Sığorta" şirkətinin sədr müavini Əkbər Mədətli deyib.
Onun sözlərinə görə, bu yeni sığorta növünün göstərilməsi sahəsində ayyarımlıq fəaliyyət nəticəsində şirkətlər həmkarlarla işə hələ ki başlamayıblar.
"Biz diqqətimizi hələ ki işəgötürənlərin maarifləndirilməsi işinə cəmləmişik, lakin belə işə həmkarlarla da başlamağa hazırıq", - Mədətli qeyd edib.
"Paşa Həyat" şirkətinin sədr müavini Niyaz İsmayılov sığorta xidmətlərinin bu növü üzrə yığımların həcmini 30-40 milyon manat səviyyəsində qiymətləndirir.
"Qala Həyat" şirkətinin Direktorlar Şurasının üzvü Vüsal Abbasov isə istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta bazarının potensialını 40 milyon manat məbləğində qiymətləndirir.
"Sığorta xidmətlərinin bu növündən daxilolmaların həcmi əməkhaqqının ümumi fondundan asılı olacaq. Belə ki, sığorta xidmətlərinin bu növü üzrə tariflər onun əsasında hesablanır", - Abbasov qeyd edib.
Azərbaycan Maliyyə Nazirliyi nəzdində Dövlət Sığorta Nəzarəti Xidmətinin rəhbəri Namiq Xəlilovun bir müddət əvvəl dediyinə görə, ölkədə istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortanın tətbiqi ölkənin işləyən əhalisinin sosial inkişafını və rifahını yaxşılaşdıracaq.
"Yeni qanunun tətbiqi təzminatların ödənilməməsi nəticəsində işçilər və işəgötürənlər arasında yaranan məhkəmə araşdırmalarının sayını da azaldacaq. Sığortanın bu növü üzrə illik yığımlar 30-40 milyon manat həddində gözlənilir", - Xəlilov qeyd edib.