Azərbaycan, Bakı, 24 fevral /Trend, müxbir İ.Xəlilova/
"Azərbaycan Dəmir Yolları" QSC ümumi məbləği 125 milyon dollar olan Loan Participation Notes tipli avroistiqrazların debüt buraxılışını həyata keçirib. Bu barədə cümə axşamı Azərbaycanın maliyyə dairələrində bildiriblər.
Avroistiqrazların ilkin yerləşdirilməsinin gəlirliliyi illik 8,25 faiz təşkil edir. Hər bir kupon üzrə ödənişlərin dövriliyi ildə iki dəfədir. Birinci buraxılış üzrə ödənişlərin tarixi 2016-cı il fevralın 18-nə təyin olunub.
Kuponların əlavə edilməsinə 2011-ci il fevralın 18-dən başlanıb.
Avroistiqraz emissiyasının yerləşdirilməsinin təşkilatçısı BNP Paribas səhmdar bankıdır, birgə menecer ATON-dur.
2011-ci ilin yanvarında Qiymətli Kağızlar Dövlət Komitəsi (QKDK) "Azərbaycan Dəmir Yolları" QSC-in ümumi məbləği 599 milyon manat olan sadə adlı sənədsiz səhmlərinin emissiyasının ilkin prospektini qeydə alıb. Bu emissiya səhmdar cəmiyyətə çevrilməsindən sonra "Azərbaycan Dəmir Yolları"nın səhmlərini ilk yerləşdirməsidir.
"Azərbaycan Dəmir Yolları" QSC 100 faizlik dövlət kapitalı ilə Azərbaycanın dəmir yolları şəbəkəsinin milli operatorudur. QSC 2009-cu ilin yayında Azərbaycan dövlət dəmir yollarının bazasında yaradılıb.
Fevralın 24-də rəsmi məzənnə 0,7943 AZN/USD təşkil edir.
