Azərbaycan, Bakı, 10 mart /Trend, müxbir N.İsmayılova/
"Moody's" agentliyi tərəfindən bu yaxınlarda Azərbaycanın yüksəldilən reytinqi mübət amildir və ölkəyə bütün kapital növlərini cəlb etməyə imkan verəcək. Bu barədə cümə axşamı Avropa Yenidənqurma və İnkişaf Bankının (AYİB) baş iqtisadçısı Erik Berqlof deyib.
"AYİB-in məqsədi özəl investorlarla rəqabət aparmaq deyil, öz maliyyəsini özəl kreditləşmənin əhatə etmədiyi sahələrə yönəltməkdir. Ümumilikdə reytinqin artırılması faktı ölkəyə kapital cəlbinə kömək etməlidir. Bu bizə ölkədə öz fəaliyyətimizi aktivləşdirməyə də imkan verəcək", - o bildirib.
Onun sözlərinə görə, neftin qiymətinin artması nəticəsində Azərbaycan dövlət büdcəsinə əsasən uzunmüddətli perspektivdə Dövlət Neft Fondu vasitəsilə istifadə ediləcək daha çox gəlir əldə edəcək.
"İndi neftin qiymətini proqnozlaşdırmaq çətindir, lakin uzunmüddətli perspektivdə onun artacağı gözlənilir. Hazırda neftin qiymətinin kəskin artması Şimali Afrikadakı vəziyyət kimi digər qısamüddətli proseslərlə bağlıdır", - o bildirib.
Onun fikrincə, Azərbaycanda inflyasiya templərinin artması qısamüddətli xarakter daşıyır və ərzaq mallarının qiymətinin artması ilə əlaqədardır.
"Bizim proqnozlara görə, Azərbaycan üçün ÜDM-in artm tempi 3-4 faizə yaxın gözlənilir", - Berqlof qeyd edib.
Cümə axşamı Bakıda keçirilən "2010-cu ildə keçid dövrü" hesabatının təqdimatı çərçivəsində Berqlof bildirib ki, Azərbaycan üçün əsas məsələ iqtisadiyyatın şaxələndirilməsi olaraq qalmaqdadır. Bu, biznes mühitinin yaxşılaşdırılmasını nəzərdə tutur.
Hesabatda deyildiyinə görə, ölkələr diqqətlərini peşəkar işçilərin sayının artırılmasına, vergi inzibatçılığının yaxşılaşdırılmasına və korrupsiyaya qarşı mübarizəyə yönəltməlidirlər.
"Biz digər ölkələrin təcrübəsinə baxsaq, vergi inzibatçılığı sahəsində əsas islahatlar vergilərin ödənilməsi sisteminin sadələşdirilməsi, vergi proqnozları sisteminin və vergilərin elektron sisteminin yaxşılaşdırılmasıdır. Bunu da Azərbaycana verilən tövsiyələrə aid etmək olar", - o bildirib.
"2010-cu ildə keçid dövrü" hesabatı Mərkəzi və Şərqi Avropada, MDB-də islahatların irəliləyişi və iqtisadi inkişaf üzrə illik yenilənmədir.
