Azərbaycan, Bakı, 11 aprel /Trend, müxbir N.İsmayılova/
Azərbaycan İqtisadi İnkişaf Nazirliyi yanında Sahibkarlığa Kömək Milli Fondunun (SKMF) Müşahidə Şurası aprelin 11-də üç kredit ittifaqının agent qismində fonda üzvlüklə bağlı ərizələrinə baxacaq. Trend-in məlumatına görə, bu barədə fondun icraçı direktoru Şirzad Abdullayev deyib.
"Bu gün fondun Müşahidə Şurasının iclası keçiriləcək. İclas çərçivəsində üç kredit ittifaqının üzvlük məsələsinə baxılacaq. Bizim vəzifəmiz əsasən Füzuli və Xocavənd rayonlarından olan çoxlu məcburi köçkünün yaşadığı Bakının şəhərətrafı qəsəbə və rayonlarını əhatə etməkdir. Çünki bu kredit ittifaqları vasitəsilə orada fəaliyyətimizi genişləndirməliyik", - Abdullayev bildirib.
Onun sözlərinə görə, SKMF-in agenti qismində son üzv 2010-cu ilin sonunda artıq fondun xətti ilə bir neçə layihəni maliyyələşdirən "AzərTürkBank" olub.
SKMF sahibkarlıq subyektlərinin güzəştli kreditləşdirilməsi üçün müvəkkil kredit təşkilatlarının sayının artırılmasında maraqlıdır. Beləliklə, hazırda 31 bank, bir bank olmayan təşkilat və dörd kredit ittifaqı fondun müvəkkil təşkilatlarıdır.