Azərbaycan, Bakı, 29 aprel /Trend, müxbir N.İsmayılova/
Azərbaycan İqtisadi İnkişaf Nazirliyi tərəfindən hazırlanan 2011-2025-ci illər üçün Azərbaycanın iqtisadi inkişafının uzunmüddətli strategiyası 2025-ci ilə qədər adambaşına düşən qeyri-neft ixracını 5 min dollaradək çatdırmağı qarşısında məqsəd qoyaraq, bununla da ölkəni regionun ticarət mərkəzinə çevirir. Trend-in məlumatına görə, bu barədə cümə günü nazirliyin strateji planlaşdırma şöbəsinin müdiri İlkin Məmmədov Bakıda keçirilən "Qloballaşma şəraitində sosial-iqtisadi inkişaf" mövzusunda Azərbaycan-Türkiyə əməkdaşlığı üzrə konfransda bildirib.
"Qeyri-neft sektorunun ixrac həcminin artırılması əsas məqsəd kimi seçiləcək və ölkə iqtisadiyyatının strukturunun optimallaşdırılması, onun rəqabət qabiliyyətinin gücləndirilməsi üçün imkan yaradaraq, bu isə öz növbəsində Azərbaycanı regional liderdən beynəlxalq iqtisadi münasibətlər sistemində ciddi qlobal iştirakçıya çevirəcək", - o bildirib.
Bu uzunmüddətli strategiyanın əsas məqsədi yüksək sosial rifaha və davamlı iqtisadi artıma nail olmaqdır.
Onun sözlərinə görə, iqtisadiyyatın rəqabətqabiliyyətli olmasına makroiqtisadi sabitliyin saxlanması, monetar və fiskal siyasətin effektivliyinin artırılması, maliyyə xidmətləri bazarının inkişafı, sahibkarların və biznes mühitinin maliyyə təminatının yaxşılaşdırılması, investisiya və xarici ticarət siyasətinin təkmilləşdirilməsi, nəqliyyat infrastrukturu və enerji təminatının inkişafı, İKT və innovasiya imkanlarının genişləndirilməsi, insan kapitalının inkişafı və dövlət idarəçiliyinin effektivliyinin artırılması yolu ilə nail olunacaq.
İqtisadiyyatın strukturunun optimallaşdırılması xidmətlər və ticarət sektorunun inkişafı, investisiya strukturunun optimallaşdırılması, ölkənin ödəniş qabiliyyətinin yaxşılaşdırılması, qeyri-neft istehsalı və emal sektorunun inkişafı, regionların ixtisaslaşması və onların tutarlı inkişafının dəstəklənməsi, kənd təsərrüfatı istehsalının və aqrar strukturun optimallaşdırılması, alternativ enerji mənbələrindən istifadənin genişləndirilməsi, neft-kimya və neft-qaz emalı sənayesinin inkişafı sayəsində təmin ediləcək.
Strategiya layihəsi Azərbaycan Prezidenti İlham Əliyevin 2009-2013-cü illər üçün regionların sosial-iqtisadi inkişafı üzrə dövlət proqramının yerinə yetirilməsinin birinci ilinin yekunlarına həsr edilən konfransda verdiyi tapşırıqlar əsasında hazırlanıb.
