Azərbaycan, Bakı, 20 may /Trend, müxbir A.Axundov/
Azərbaycanın "Başak-İnam Sığorta Şirkəti" ölkə regionlarında filiallarının sayını indiki 2-dən 5-dək artırmağı planlaşdırır. Bu barədə Trend-ə cümə günü şirkətin baş direktoru Orxan Həsənov deyib.
"Bizim məqsədimiz fialların sayını 5-ə çatdırmaqdır. Bu günlərdə Xaçmazda filial açılacaq, daha ikisini Lənkəran və Zaqatalada açmağı planlaşdırırırq", - Həsənov qeyd edib.
Hazırda şirkətin Gəncə və Beyləqanda filialları var.
Həsənovun sözlərinə görə, "Başak-İnam Sığorta Şirkəti" kənd təsərrüfatını şirkətin ən prioritet istiqaməti etməyi planlaşdırır. Buna görə də nisbətən yeni filiallar ölkənin regionlarında açılır.
"Biz indi kənd təsərrüfatı üzərində işləyirik. Hərçənd ki, bu, Azərbaycan bazarı üçün yeni məhsul deyil, lakin heç bir şirkət bu sahə ilə ciddi şəkildə məşğul olmur və biz bu bazara peşəkarcasına daxil olmağı planlaşdırırıq", - Həsənov bildirib.
Onun sözlərinə görə, ötən ay şirkət xaricə gedən turistlərin sığortalanması üçün məhsulu işə salıb.
Azərbaycanın sığorta şirkəti "Başak-İnam Sığorta Şirkəti" ölkənin sığorta bazarında 1996-cı ildən fəaliyyət göstərir. Şirkətin səhmlərinin 49 faizi dünyanın 15 ölkəsində fəaliyyət göstərən Fransa və Avropanın ən iri şirkəti Groupama - Groupama Sigorta A.Ş. şirkətinə məxsusdur. Qalan 51 faiz tərkibinə "TuranBank", "AzərTürkBank", "Aqrarkredit" və fiziki şəxslərin daxil olduğu Azərbaycan səhmdarlarına məxsusdur.
Azərbaycan Maliyyə Nazirliyi yanında Dövlət Sığorta Nəzarəti Xidmətinin məlumatına görə, 2010-cu ildə şirkətlərin yığımları 2,6 milyon manat, ödənişləri isə 1,5 milyon manat təşkil edib, 2011-ci ilin yanvar-aprelində yığımlar artıq 1,086 milyon manata, ödənişlər isə 0,359 milyon manata çatıb.
Mayın 20-nə olan rəsmi məzənnə 0,7902 AZN/USD təşkil edir.
