Azərbaycan, Bakı, 27 may /Trend, müxbir N.İsmayılova/
Mərkəzi Avrasiya Banklar Federasiyası bu gün Bakıda keçirilən təsisçilərin ilk yığıncağı çərçivəsində Beynəlxalq Banklar Federasiyasına (IBFed) daxil olmaq barədə qərar qəbul edib. Bu barədə federasiya prezidenti Eldar İsmayılov deyib.
"Biz Avropa Banklar Federasiya, Asiya Banklar Federasiya, Çin və ABŞ-ın banklar assosiasiyalarının və digər bank sistemlərinin üzvü olduğu Beynəlxalq Banklar Federasiyasına daxil olmaq üçün ərizə vermişik", - İsmayılov bildirib.
Onun sözlərinə görə, bu, Mərkəzi Avrasiya Banklar Federasiyasına üzv ölkələrin banklarına dünya bank sisteminə və beynəlxalq maliyyə arxitekturuna inteqrasiya etməyə imkan verəcək.
IBFed milli banklar assosiasiyaları qrupu üçün səlahiyyətli orqandır.
Azərbaycanın Ədliyyə Nazirliyi Mərkəzi Avrasiya Banklar Federasiyasını 2010-cu ilin avqustunda qeydiyyata alıb. Federasiyanını təsisçiləri Azərbaycan, Gürcüstan, Qırğızıstan və Ukrayna banklar assosiasiyalarıdır. Türkiyə və Tacikistanın banklar assosiasiyaları da federasiyanın üzvləridir.
Mərkəzi Avrasiya Banklar Federasiyasının mənzil-qərargahı Bakıda yerləşir. Federasiyaya Mərkəzi Avropa və Asiya ölkələrinin banklar assosiasiyaları daxildir. Onlar bank və pul-kredit siyasətini birgə işləyib hazırlayacaqlar.
