Azərbaycan, Bakı, 31 may /Trend, müxbir A.Axundov/
Azərbaycan-Pakistan lizinq şirkəti "MCB Lizinq" MDB ölkələrində və Gürcüstanda filialların yaradılması ilə bağlı əvvəllər açıqlanan planlarını təxirə salıb. Bu barədə çərşənbə axşamı Trend-ə şirkətin idarə heyətinin sədri Ramal Cəfərov bildirib.
"Əvvəllər biz Kiyev və Tbilisidə filiallar açmağa hazırlaşırdıq, lakin sonradan şirkətin strateji planına dəyişikliklər edilib. Filiallar yalnız 2012-ci ildən sonra yaradılacaq", - Cəfərov bildirib.
Onun sözlərinə görə, həmin vaxta qədər MDB ölkələri və Gürcüstan bazarının tədqiqatı aparılacaq, bundan sonra filialın harada açılması ilə bağlı qərar qəbul ediləcək.
Bundan başqa, şirkət Azərbaycanın regionlarında da filiallar açmağa hazırlaşmır.
"Bu o demək deyil ki, biz ölkə regionları ilə işləmirik. Hərçənd ki, bizim ofisimiz Bakıda yerləşir, biz avadanlıqları lizinqə rayonlara veririk", - Cəfərov qeyd edib.
2011-ci il mayın 31-nə şirkətin lizinq portfeli 2,378 milyon manat təşkil edir. 2011-ci ilin sonuna onun 5,5 milyon manatadək artacağı gözlənilir.
Şirkət 13 iyul 2010-cu il tarixində fəaliyyətə başlamasını rəsmən elan edib. "MCB Lizinq" lizinq şirkəti ölkənin vergi orqanlarında 15 oktyabr 2009-cu il tarixində dövlət qeydiyyatından keçib. Şirkətin nizamnamə kapitalı 1,5 milyon manat təşkil edir. "MCB Lizinq"in təsisçiləri iştirak payının 70 faizinə malik Pakistanın "MCB Bank LTD" şirkəti və Namiq Səfərovdur.
Pakistanın MCB bankının altı milyard dollardan çox aktivi, 1500 filialı var və dünyanın səkkiz ölkəsində təmsil olunub. O, əsas fəaliyyəti tekstil sənayesində və dünyanın aparıcı brendləri üçün məhsul istehsalında cəmləşən "Nishat Group" şirkətlər qrupuna daxildir.
Azərbaycanda rəsmən 22 lizinq şirkəti qeydiyyatdan keçib, lakin real şəkildə lizinq xidmətləri təklif edən 11 aktiv lizinq şirkəti və bank fəaliyyət göstərir.
Mayın 31-nə olan rəsmi məzənnə 0,7894 AZN/USD təşkil edir.
