Azərbaycan, Bakı, 28 iyun /Trend, müxbir A.Axundov/
Yaxın 5-7 il ərzində Azərbaycanda daşınmaz əmlak bazarının böhran qədərki fəallıq səviyyəsinə çatacağı gözlənilmir. Bu barədə Trend-ə çərşənbə axşamı "MBA Group" konsaltinq şirkətinin baş direktoru Nüsrət İbrahimov deyib.
"Ötən əsrin 90-cı illərində, xüsuilə birinci yarısında Azərbaycanın tikinti sektoru iflic vəziiyətində idi, buna görə 2000-ci illərin əvvəlində potensial tələbat yarandı. Sonra tikintinin inkişafı və bazara yeni məhsulların daxil olması ilə ajiotaj əmələ gəldi", - İbrahimov əlavə edib.
Onun sözlərinə görə, bu ajiotajı pul toplayan və bu pulları hara yatırmağı bilməyən invetsorlar gücləndirdilər.
"Pulların banklara qoyulmasını onlar riskli hesab edirdilər, eyni zamanda qiymətli kağızlar bazarı da inkişaf etməmişdi. Bu pulların inflyasiyadan qorunması üçün yeganə yolunu onlar daşınmaz əmlak bazarına investisiya yatırmaqda görürdülər. Bu həm qiymət artımına, həm də fəallığa gətirib çıxardı", - İbrahimov qeyd edib.
Onun sözlərinə görə, bu gün insanlar pulların bank depozitlərinə yatırılmasına üstünlük verirlər.
"Bu gün bank sektoru inkişaf dövrünü yaşayır, risklər 10 il bundan əvvəlkinə nisbətən daha azdır. Bundan başqa, bank depozitlərinin gəlirliyi (10,8 faiz) bu gün daşınmaz əmlakın gəlirliyindən yüksəkdir (ildə 6,2 faiz). Buna görə bu gün insanlar daha çox banklara inanırlar və pullarını depozitlərə yatırmağa üstünlük verirlər", - İbrahimov deyib.
Onun sözlərinə görə, bununla əlaqədar alıcı investorlar daşınmaz əmlak bazarını tərk ediblər.
"Daşınmaz əmlak bazarında alıcı kimi yalnız mənzilə real ehtiyacı olan insanlar qalıb. Onlar demək olar, qiymət və fəalıq artımına təsir göstərə bilməzlər. Bundan başqa, bazarda artıq təklif var və bu təklif azalmayınca, qiymətə təsir gözlənilmir. Artıq təklifin birdəfəlik azalması üçün 1,5-3 il lazımdır. Bundan sonra bazar sabit olacaq", - İbrahimov vurğulayıb.
O, xarici investorların maraqlarının azalmasını təbii hesab edir.
"Bu gün ölkəyə əvvəllər olduğu kimi xarici investisiya axını yoxdur. Xüsusilə, ölkənin daşınmaz əmlakına Rusiyadan böyük investisiya axını müşahidə olunurdu. Son iki ildə bu axın demək olar dayanıb", - İbrahimov qeyd edib.
Daşınmaz Əmlakın Dövlət Reyestri Xidmətinin məlumatına görə, 2010-cu ildə xarici vətəndaşlar Azərbaycanda 1110 daşınmaz əmlak obyektinin sahibi olublar. Bunun 765-i Bakıda, 66-sı Sumqayıtda, 50-dən çoxu Gəncə və Yevlax ərazi idarələrinə, 30-32-si Cəlilabad və Yevlax ərazi idarələrinə qeydiyyatdan keçib.
Xarici vətəndaşlar daşınmaz əmlakı əsasən Bakıda burada yaşayıb işləmək üçün alırlar.
