Azərbaycan, Bakı, 3 sentyabr /Trend, müxbir A.Axundov/
Bakının daşınmaz əmlak bazarının ümumu portfelində qiyməti 68-70 min dollar olan mənzillər daha yüksək çəkiyə malikdir. Onların payına bütün mənzillərin 26,4 faizi düşür. Bu barədə bazar ertəsi "Əmlak Bazarı İştirakçıları" İctimai Birliyindən bildirilib.
Tədqiqata görə, Bakı mənzillərində hər otağın orta qiyməti avqustda 43 350 dollar, hər mənzilin orta qiyməti 109 676 dollar olub. Mənzillərdəki otaqların orta sayı 2,53 təşkil edib.
Avqustda qiymət indeksinin artımı 2,8 faiz müşahidə olunub, bazarda 1 kvadratmetr üçün orta qiymət ay ərzində 1286 dollardan 1314 dollara çatıb.
Qiymət artımı "Kiyev", "Leninqrad", "Minsk" və "fransız" layihəli evlərdə olub.
"Bu fakt, əsasən, onunla bağlıdır ki, həmin layihələr üzrə tikilən mənzillər ipoteka predmetidir. Bu səbəbdən, ucuzlaşan mənzillər ancaq "Axundov", "italyan" və eyni zamanda memarlıq layihələri ilə tikilmiş mənzillərdir", - məlumatda bildirilib.