Azərbaycan, Bakı, 14 sentyabr /Trend, müxbir N.İsmayılova/
"2011-2020-ci illərdə Azərbaycanda qiymətli kağızlar bazarının inkişafı" Dövlət Proqramının icrası üzrə fəaliyyət planına yaxın vaxtlarda əlaqələndirmə qrupunun ikinci iclasında baxılacaq.
Əlaqələndirmə qrupunun iyunun 10-da keçirilən birinci iclasında dövlət strukturlarına Dövlət Proqramı çərçivəsində qəbul olunmuş tədbirlər planının icrası ilə əlaqədar fəaliyyət planının hazırlanması tapşırılıb. Trend-in məlumatına görə, bu barədə çərşənbə günü jurnalistlərə Qiymətli Kağızlar üzrə Dövlət Komitəsinin idarə heyətinin sədr müavini İlqar Muradov deyib.
Qrupa Maliyyə, Vergilər, Ədliyyə, İqtisadi İnkişaf, Rabitə və İnformasiya Texnologiyaları, Təhsil nazirlikləri, Mərkəzi Bank, Əmlak Məsələləri Dövlət Komitəsi və Auditorlar Palatasının nümayəndələri daxildir.
Muradov qrupun növbəti iclasının dəqiq vaxtını bildirməyib.
"Dövlət Proqramının hazırlanması çərçivəsində bazarın inkişafının prioritet istiqamətləri müəyyən olunub. Bu istiqamətlər üzrə tədbirlərin keçirilməsi ölkədə qiymətli kağızlar bazarının inkişafına təkan verəcək", - o deyib.
Onun sözlərinə görə, tədbirlər planı bazar infrastrukturunun yenidən nəzərdən keçirilməsi, maliyyə savadlılığının artırılması, qanunvericiliyin təkmilləşdirilməsi, həmçinin maliyyə vasitəçiliyi sahəsində tədbirlərin həyata keçilirməsini nəzərdə tutur.
Dövlət Proqramı 2011-ci il mayın 16-da Prezident İlham Əliyev tərəfindən təsdiq olunub.
