Azərbaycan, Bakı, 30 sentyabr /Trend, müxbir N.İsmayılova/
Bakıda RF Baş nazirinin müavini və ticari-iqtisadi əməkdaşlıq üzrə Azərbaycan-Rusiya hökumətlərarası komissiyasının həmsədri Aleksandr Xloponinin səfəri çərçivəsində Azərbaycan-Rusiya biznes forumu keçiriləcək. Trend-in məlumatına görə, bu barədə Azərbaycanda İxracın və İnvestisiyaların Təşviqi Fondunun (AZPROMO) cümə günü yaydığı məlumatda deyilir.
Xloponin həmçinin RF Prezidentinin Şimali Qafqaz Federal Dairəsi üzrə səlahiyyətli nümayəndəsidir.
AZPROMO-nun təşkil etdiyi forum 2011-ci il oktyabr ayının 4-də keçiriləcək.
Tədbirə kənd təsərrüfatı və qida sənayesi, energetika, tikinti, konsaltinq, maşınqayırma və digər sektorları təmsil edən Rusiya iş adamlarının qatılacağı gözlənilir.
Əlavə məlumat üçün Anar Nuriyevə müraciət etmək olar: tel.: 012 598-01-47/48 (123), e-mail: [email protected]
Xloponinin Bakıya səfəri zamanı bir sıra sazişlərin imzalanması gözlənilir.
Bundan əvvəl Rusiyanın Azərbaycandakı ticarət nümayəndəsi Yuri Şedrin bildirib ki, bunlardan iki saziş artıq tamamlanır.
"İki saziş layihəsi artıq tamamlanma ərəfəsindədir. Bunlar Rusiya Vahid Energetika Sistemi ilə Azərbaycan Energetika Sisteminin paralel işinin təmininə dair tədbirlər və əmək miqrasiyası haqqında sazişlərdir", - o deyib.
Habelə səfər zamanı hələ də barəsində mübahisəli məsələlər olan "İnvestisiyaların qarşılıqlı qorunması və təşviqi" üzrə hökumətlərarası saziş layihəsi ilə bağlı müzakirələrin aparılması da istisna olunmur.
Azərbaycan və Rusiya 2011-ci ildə əmtəə mübadiləsində 2,8-3 milyard dollar səviyyəsində rekord həcmə çatmağı planlaşdırırlar.
Azərbaycan DGK-nın göstəricilərinə görə, yanvar-avqust ayının yekunlarına əsasən, iki ölkə arasındakı əmtəə mübadiləsi ötən ilin müvafiq dövrü ilə müqayisədə 62,9 faiz artaraq təxminən 1,92 milyard dollar təşkil edib.
Azərbaycanın Rusiyaya ixracı 72,7 faiz artaraq 832,3 milyon dollar, Rusiyadan idxal isə 56,1 faiz artaraq 1,085 milyard dollar təşkil edib.