AXA MBASK sığorta şirkəti idarə heyətinin sədr müavini Rəşad Abbasovla müsahibə
- Bir ildən çoxdur ki, dünyanın ən iri sığorta şirkətlərindən AXA Azərbaycan sığorta bazarına qədəm basıb. Ötən bu ili necə dəyərləndirərdiniz?
- Bu il həm mürəkkəb, həm də maraqlı və uğurlu oldu. 2010-ci ilin sonu yeni lisenziyanı almaq, müxtəlif icazə və qeydiyyatlarla bağlı hüquqi məsələləri həll etməklə keçdi. Dekabr ayında AXA MBASK-ın Direktorlar Şurası 2011-ci ildə əsas inkişaf istiqamətlərini müəyyənləşdirdi, bu ilin yanvar ayından isə şirkətdə islahatlar dövrü başladı. Həmin dövrdə nəzərdə tutduğumuz demək olar, bütün dəyişikliklər həyata keçirilib, islahatlar prosesi başa çatdırılıb, şirkətimiz böyüyüb və keyfiyyətcə yeniləşib. Rəqəmlərə gəlincə, bu ilin 10 ayı ərzində biz ötən ilin müvafiq dövrü ilə müqayisədə 60 faizdən çox böyümüşük. Üstəlik 2010-ci ilin yekunlarına görə 8,3 milyon manatlıq nəticə əldə etmişdiksə, bu gün həmin göstərici 11 milyon manatdır.
- AXA MBASK şirkəti beynəlxalq AXA sığorta qrupunun bir parçasıdır. AXA sığorta bazarımıza nələr gətirib?
- AXA MBASK şirkəti maliyyə müdafiəsi sahəsində dünya lideri olan AXA Group-un bir hissəsidir. AXA Group dünyanın 57 ölkəsində fəaliyyət göstərir, gəliri 90 milyard avrodan, müştəri sayı da 96 milyondan artıqdır. Təbii ki, AXA Group kimi qüdrətli səhmdarı olan şirkət onun zəngin beynəlxalq təcrübəsindən, həmçinin onun təkrarsığorta sahəsindəki maliyyə imkanlarından bəhrələnməyə çalışıb. Məhz bu üstünlükləri nəzərə alaraq sığorta bazarının bir çox iştirakçıları bizdən daha fəal inkişaf stratejisi gözləyirdilər. Lakin onu da bildirməliyəm ki, AXA-nın başlıca dəyərləri peşəkarlıq, komanda ruhu, yenilikçilik, dürüstlük və ən əsası da praqmatizmdir. Məhz bu dəyərləri rəhbər tutan keyfiyyətcə yeni bir şirkətin qurulması ilə ötən müddət məşğul olduq. MBASK-da olan ən yaxşı cəhətləri saxlayaraq qısa müddət ərzində AXA-dakı ən mütərəqqi xüsusiyyətləri tətbiq etməyə çalışmışıq. Məncə ən başlıca nailiyyətimiz sığortaya və sığortaçılığa tamamilə yeni yanaşma və baxış ortaya qoymağımızdır. Nəticədə şirkətin yeni şüarı yarandı: sığortaçılığa yeni baxış. Sığorta məhsullarının satışına yeni yanaşmamıza uyğun olaraq əsas diqqəti agentlər şəbəkəsi vasitəsilə məhsulların pərakəndə satışına, peşəkar sığorta agentləri şəbəkəsini genişləndirməyə yetirməyə başladıq.
- Yəni bu il AXA MBASK şirkətinin daxili quruluşunu dəyişdirməyə, təkmilləşdirməyə və inkişaf etdirməyə həsr olunub. Bəs şirkətin gəlirini və bazar payının artırılması məqsədləri qarşıya qoyulubmu?
- Şirkətin daxili inkişafı məsələlərini tam həll etmədən bazarda mühüm nəticələr əldə etmək o qədər də asan deyil. Beynəlxalq qrupun üzvü olandan sonra biz AXA Group-un yüksək dünya standartlarına yaxınlaşmaq üçün əvvəla, daxili islahatları ən qısa zamanda həyata keçirməyə çalışdıq. Bununla belə, səhmdarlarımız şirkətin istər gəlirlərinin, istərsə də onun bazardakı xüsusi çəkisinin artırılmasına dair xeyli iddialı vəzifələr qoyurdular. Əlbəttə, bu ili on ən güclü sığorta şirkəti sırasında başlayan dünya şöhrətli və nüfuzlu sığortaçının bazardakı mövqeyini yaxşılaşdırmaq niyyətində olması təbii haldır. Bu ilin planına məhz hansı göstəricilərin salındığını deyə bilmərəm, amma onu bildirim ki, işlərimiz həmin plana tam uyğun gedir və 2011-ci ilin birinci yarısının yekunlarına görə AXA MBASK 60 faizdən çox artım sürətilə ölkənin beş ən yaxşı sığorta şirkəti sırasına inamla daxil olub.
- Daxili inkişafla bağlı hansı layihələriniz daha çətin olub?
- Əslində beynəlxalq sığortaçıdan asan layihələr gözləmək yersiz olardı, bu layihələrin hamısı çətin, amma şirkətimiz üçün eyni dərəcədə vacibdi. Ən çətini psixoloji cəhətdən dəyişib AXA-nın dəyərlərini, prinsiplərini, standart və yanaşmasını mənimsəməkdi. 18 ildən çoxdur müəyyən standartlara riayət etdikdən sonra bir neçə aya tamamilə başqa standart tətbiq etmək asan məsələ deyil. Bir çox layihələr həyata keçirdik və bunlardan ən çətini və vacib olanı iş proseslərin tam avtomatlaşdırılması layihəsini hesab edirəm. Belə ki, bir neçə ay ərzində İT infrastrukturu üzərində işləri başa çatdırıb az qala bütün kargüzarlıq məsələlərini əhatə edən yeni İT platformunu tətbiq etdik, sığorta şəhadətnamələrini onlayn rejimdə buraxmağa başladıq. Bu gün şirkətdə demək olar, bütün işlər xüsusi hazırlanmış modullar vasitəsilə aparılır. Biz kompüter ekranından ayrılmadan şirkətin bütün bölmələrinin fəaliyyətini və nəticələrini izləyir, bu nəticələri və mənfəəti qiymətləndirir, satışlara və sığorta ödənişlərinə nəzarət edir, sığorta portfelinin monitorinqini aparır, müxtəlif müqavilələrin mənfəətli və ya ziyanlı olduğunu təyin edirik. Belə ki, şirkətin fəaliyyətini tam avtomatlaşdırmağa doğru mühüm addımlar atmışıq.
- Yeni İT platformu kənar istifadəçilər üçün nə kimi üstünlüklər yaradır?
- Kənar istifadəçilər arasında əvvəla, çoxlu sayda agentlərimizi göstərmək istərdim. Bunlar banklar, avtosalonlar, avtomobil icarə şirkətləri, iş adamları, keçmiş sığortaçılar və sadəcə sığortaçılıqla məşğul olmaq istəyən şəxslərdir. Sığorta şəhadətnamələrin buraxılışını asanlaşdırmaq üçün onları şirkət ofisindən kənarda buraxmaq imkanı verən bir sistem yaratmışıq. İndi sığorta şəhadətnamələrini buraxmaq üçün internet çıxışı və parol kifayətdir. Çox asan və tezdir. Bu, ölkə boyu filial şəbəkəsinə malik banklar və başqa maliyyə qurumları üçün də olduqca sərfəlidir.
- Banklar və sığorta şirkətləri arasında əməkdaşlıqda dünya təcrübəsinə əsaslanaraq banklar üçün hansı yeniliklər təklif edərdiniz?
- Bankların, məsələn, girov əmlakını sığortalamağın böyük əhəmiyyətini nəzərə alaraq biz onlar üçün xüsusi İT sistemi hazırlamışıq. Bu gün əməkdaşlıq etdiyimiz bankın hər bir əməkdaşı kredit müqaviləsi tərtib etməklə onlayn rejimdə sığorta şəhadətnamələri də buraxa bilər. Amma əslində indi bankların potensialı tam olaraq istifadə olunmur. Bank sığortaçılığı deyəndə çoxları yalnız bankların girov əmlakının sığortalamasını nəzərdə tutur. Girovla kredit verən bank ilk növbədə həmin girovun sığortalanmasında maraqlı olduğundan sözügedən sığorta növü bir növ könüllü-məcburi məsələyə çevrilib. Girovun sığortalamasından o yana isə iş getmir. Mövcud imkanlar elə bankların özü tərəfindən istifadə olunmur. Xaricdə bankların çoxu sığorta məhsullarının az qala bütün çeşidinin satışını həyata keçirirlər, əsasən də bankın xalis gəlirini artırmaq üçün. Çox geniş müştəri dairəsinə malik bank çarpaz satışlar aparır. Bir çox inkişaf etmiş ölkələrdə insanlar banklarda sırf bank xidmətlərilə yanaşı sığorta məhsullarını ala, mənzillərini, maşınlarını, hətta həyatlarını da sığortalaya bilirlər. Azərbaycandakı bankların da bir çoxu riteyl sahəsini inkişaf etdirərək riteyl müştərilərilə işləyir, bölgələrə çıxırlar. Riteyl sahəsini inkişaf etdirən banklar öz müştərilərinə eyni zamanda sığorta məhsullarını da təqdim edə bilər. Sığorta məhsullarının satışı bank işçilərinin çox vaxtını aparmasın deyə, biz sığorta şəhadətnamələri tez və asan buraxmaq üçün proqram təminatını hazırlamışıq. Üstəlik müştəri sığorta növü üzrə sığortalanıbsa, başqa növ üzrə şəhadətnamələrin buraxılışı iki dəfə az vaxt aparır. Banklara təklifimiz kifayət qədər sadədir. Bank sığortaçılığı sahəsində banklarla daha yaxından əməkdaşlıq üçün bütün imkanlar, biliklər, dünya təcrübəsi bizdə var.
- Sığorta agentlərinin roluna toxundunuz. Sığorta agentləriniz nə qədərdir və onlarla necə çalışırsınız?
- Başqa sığorta şirkətlərindəki kimi, bizim də sığorta agentlərimiz çoxdur. Amma peşəkar sığorta agentlikləri sığorta bazarında yox dərəcəsindədir. Məsələn, siz bankın rəsmi blankını küçədə maşınının kapotu üstünə qoyub dolduran bir nəfərdən bank kreditini rəsmiləşdirməyi, yaxud həmin adamdan, lap elə rəsmi dilerin nümayəndəsi olsa belə, məişət cihazları almağı yəqin ki, ağlınıza da gətirməzsiniz. Lakin bu gün sığorta agentləri təəssüflər olsun ki, məhz belə maşının kapotu üstünə rəsmi sənədləri tərtib edən adamlardır. Peşəkarlıq tərəfdarı kimi biz sığorta agenti işinə tamamilə başqa yanaşma təqdim etmək istəyirik. Bizimlə əməkdaşlıq müqaviləsi bağlayan sığorta agentləri öz ofislərini açır, müvafiq təlimlər keçərək müştərilərə şirkətimizin standartlarına uyğun xidmət göstərir, sığorta müqavilələrini birləşmiş sistemdən oradakı şərtlər və tariflərə əsasən çap etdirirlər. Biz agentlərimizə satdıqları sığorta müqavilələrinə dair, hər müştəriyə dair, gəlir və mənfəətə dair qeydiyyat və xüsusi hesabatlar aparmağa kömək edir, sığorta portfellərinə nəzarət etməyə şərait yaradır, biznesi genişləndirib inkişaf etdirməkdə yardım göstəririk. AXA MBASK sığorta agenti bu gün yeni və nüfuzlu peşədir. Bu, bizim yox, bizimlə iş görən agentlərin fikridir. Bu gün AXA MBASK-ın sığorta agentlikləri ölkəmizin bir çox şəhərlərində açılır, getdikcə daha çox agent gələcəyini məhz bizim şirkətlə bağlamağı üstün tutur. Biz də agentliyin yerləşdiyi şəhərə, gəlir səviyyəsinə, portfelin tərkibinə, təcrübəsinə baxmayaraq onların hamısına kömək edirik. Bizim üçün hər təfərrüat mühümdür. Sığorta agentliklərinin otaqlarında mebelin rəngindən, girişin üstündəki lövhənin dizaynından tutmuş ofisdəki kompüterlərin markasına və tipinə qədər bütövlüklə AXA MBASK standartlarına tam uyğun tərtib edilir. Biz agentlərimizi həvəsləndirmək üçün çoxpilləli motivasiya sistem təklif edirik, çünki müştəri məmnuniyyətinin bizim şirkətimiz adından müştərilərə xidmət göstərən agentlərin məmnunluğundan asılı olduğunu bilirik.
- AXA MBASK müştərilərinə nə kimi yeniliklər təqdim edir?
- İlk olaraq keyfiyyətcə yeni səviyyədə xidmət. Biz müştəri-yönlü şirkətik və hər müştərinin tələb və arzularına fərdi yanaşma tətbiq edirik. Sığorta təkliflərinə gəlincə bunlar bazarda çoxdur. Hərçənd bir çoxları bazarda yeni və maraqlı sığorta məhsullarının qıtlığından şikayətlənirlər. Mən isə kəmiyyətdən çox keyfiyyətə üstünlük verənlərdənəm. Bir çox sığorta şirkətləri 20-dən artıq sığorta növü təklif edir və bu az rəqəm deyil. Məsələn, avtomobillərin KASKO sığortası kimi ənənəvi məhsullar təklif edən bir çox sığortaçıların fikrincə, müştəriləri cəlb edən yeganə meyar qiymət amilidir. Əlbəttə, qiymət əhəmiyyətli məsələdir, amma heç də yeganə meyar deyil. Çoxları müştəriyə sərfəli qiymət təklif etməkdən başqa ona səviyyəli xidmət də göstərməyin, ən əsası isə öz öhdəliklərini və vədlərini yerinə yetirməyin vacib olduğunu unudurlar. Belə ki, məhsulun keyfiyyətini qiyməti yox, xidmət səviyyəsi və öhdəliklərin icrası şərtləndirir. Biz ucuz sığorta məhsulları satmağa çalışmırıq. Müştərilərə xidmətin səviyyəsini istər sığorta müqaviləsinin tərtibatı və qüvvədə olduğu müddətdə, istərsə də sığorta hadisəsi baş verdikdə və sığorta iddiasını tənzimləyib sığorta ödənişini həyata keçirərkən, yəni üzərimizə götürdüyümüz öhdəlikləri yerinə yetirərkən məhsul və xidmətlərimizi dünya şöhrətli AXA keyfiyyət markası ilə satdığımızı unutmuruq. Bu keyfiyyət isə ucuz ola bilməz. Hər bir sığorta məhsulunun maya dəyəri var. Təkrarsığortanı şərtləndirən iri risklər zamanı təkrarsığortanın dəyəri qiymətə xeyli təsir edir. Təkrarsığortaya ehtiyac qalmadığı kiçik və daha kütləvi məhsullarda isə qiymət, yaxud da sığorta tarifi zərərliyin, inzibati xərcləri, vasitəçilik haqqı və təbii ki, gözlənilən mənfəətin məbləği kimi ünsürlərdən yaranır.İri risklərlə bağlı müştərilərimizə daha sərfəli qiymətlər təklif edə bilmək üçün bir çox təkrarsığortaçılarla əməkdaşlıq edir, həmçinin AXA Group-un təkrarsığorta imkanlarından yararlanırıq. Yəni iri müştərilərimiz məhz AXA Group-da təkrarsığorta şərtlərinin daha əlverişli və çevik olması sayəsində bizimlə daha sərfəli şərtlərlə işləyə bilirlər.
Kütləvi məhsullara gəlincə məsələ çox bəsitdir. Sığorta hadisələrinə çəkilən xərclərə, vasitəçilik haqqına, şirkətin mənfəətinə xələl gətirməmək şərtilə müştərilərə daha cazibəli qiymətlər təklif edə bilmək üçün tariflərdəki inzibati xərclərini azaltmağa çalışırıq. Bunun da yeganə yolunu iş prosesləri tam avtomatlaşdırmaqda görürük. Belə ki, bayaq bəhs etdiyim avtomatlaşdırma dolayı şəkildə müştərilərimizə də, daha doğrusu müştərilərin bizdən aldıqları sığorta məhsulların qiymətinə təsir edir. Bununla yanaşı AXA məşhur riteyl brendıdır. Geniş əhaliyə sığorta məhsullarının pərakəndə satışlarını inkişaf etdirmək AXA-nın bütün dünyada inkişaf strategiyasıdır. Belə ki, sığortanın kütləviliyi AXA-nın başlıca prinsipləri arasındadır. Bunun yolunu təkcə əlverişli qiymətlərdə yox, həm də müştəriyə yaxın olmaqda görürük. Bu gün AXA MBASK şirkətinin sığorta məhsullarını şirkətin beş regional ofisi ilə yanaşı ölkənin bir çox yerlərində fəaliyət göstərən peşəkar sığorta agentliklərimizdən almaq olar. Özü də müştərilərimiz əmin olsunlar ki - sığorta hadisəsi baş verdikdə bizim mütəxəssislər günün 24 saatı, həftənin 7 günü ərzində ölkənin hər guşəsində onların qulluğundadır.
- Məlumdur ki, beynəlxalq şirkətlərin çoxu sosial və korporativ məsuliyyət məsələlərinə böyük əhəmiyyət verir. Bəs sizin üçün sosial və korporativ məsuliyyəti nə deməkdir?
- Bəli, sosial və korporativ məsuliyyət məsələləri AXA MBASK şirkətinin öncüllükləri sırasındadır. Hərçənd sosial məsuliyyətimizi AXA-nın gəlişindən xeyli əvvəl dərk etmişik. Hələ MBASK brendı altında müxtəlif sosial layihələr üzərində çalışarkən əsas aidiyyatı qurumlarla, mütəxəssislərlə, yerli icmalarla, KİV-lə, QHT və xeyriyyə təşkilatları ilə uzun illər ərzində işləmişik və hələ də işləyirik. Bu dəyərlərin AXA Group korporativ mədəniyyətinin və stratejisinin tərkib hissəsi olması bizim üçün çox mühümdür. Belə ki, yalnız bu il Save the Children və Qızıl Aypara kimi təşkilatlarla bir sıra geniş birgə xeyriyyə tədbirləri həyata keçirmişik. Bu kimi tədbirlərin çox vaxt bizim əməkdaşların şəxsi təşəbbüsü ilə gerçəkləşdirildiyini də vurğulamaq istərdim. Şirkətimizin əməkdaşları müntəzəm olaraq uşaq evlərinə və internatlara baş çəkir, uşaqlar üçün müxtəlif tədbirlərin təşkilində iştirak edirlər. Kimsəsiz, valideyn himayəsindən məhrum uşaqlar ən həssas, qorunmasız təbəqədir, daim diqqət və qayğıya möhtacdırlar. AXA MBASK olaraq biz bu gün və gələcəkdə sosial məsuliyyət layihələrinin əhəmiyyətini aydın dərk edir və keçirdiyimiz tədbirlərlə sosial problemlərin həllinə müəyyən töhfə verməyə ümidvarıq. Korporativ məsuliyyət isə bizim üçün müştərilərimizin tələbatını ödəmək, risklərin peşəkar idarəetməsi, işgüzar partnyorlarımıza ədalətli yanaşma, qarşılıqlı etimada, dəyişkənliyə və korporativ dəyərlərə söykənən işgüzar mühit yaratmaq üçün etibarlı çözümlər hazırlamaqdan başlayır. Bundan əlavə biz neçə illərdir ölkənin sığorta şirkətləri arasında ən çox vergi ödəyənlərdənik. Məsələn, bu il AXA MBASK dövlət büdcəsinə cəmi 950 min manat məbləğində vergi köçürüb. Qısası, yaşadığımız və işlədiyimiz cəmiyyətə imkan daxilində faydalı olmağa çalışırıq.
- Sığorta bazarındakı rəqiblərinizi necə qiymətləndirirsiniz?
- Bu barədə fikir söyləmək istəmirəm. Fikrimcə, rəqiblərə onların səhmdarları, ya da müştəriləri qiymət verə bilər. AXA MBASK-ın inkişaf strategiyasında biz sığorta bazarının inkişaf dinamikasını mütləq nəzərə alırıq. Özü də stratejimiz müəyyən bir rəqib şirkətin fəaliyyətinə görə təyin edilmir və ya dəyişdirilmir. Məqsəd və vəzifələrimizi dəqiq müəyyənləşdirmişik, yerli sığorta şirkətinin xidmət və başqa sahələrdə dünya standartları səviyyəsində necə inkişaf etdirəcəyimizi çox aydın təsəvvür edirik. Amma onu da başa düşürük ki, bizim və bazarda hər bir şirkətin böyüməsi bütövlüklə bazarın böyüməsilə, oradakı bütün iştirakçılar arasında sağlam əməkdaşlıqla mümkündür. Biz bütün sığortaçılarla əməkdaşlığa hazırıq. Onlara sərfəli təkrarsığorta şərtləri, həmçinin beynəlxalq təcrübə və biliklərimizi təqdim edə bilərik. Ölkəmizdə sığorta mədəniyyətini və sığortaçılığı birgə inkişaf etdirmək istərdik.
- Ümumiyyətlə, sığorta bazarının vəziyyəti və inkişafı barədə nə düşünürsünüz?
- Sığorta bazarının inkişafı bir çox amildən asılıdır. Bunlardan başlıca amillər ölkədə ümumiyyətlə iqtisadiyyatın və o cümlədən maliyyə sektorunun inkişafı, əhalinin gəlir və alıcılıq qabiliyyətinin artması, müvafiq hüquqi bazanın olub-olmaması, sığorta tənzimlənməsinin və nəzarətinin güclü olması, həmçinin sığorta mədəniyyətinin səviyyəsi, sığortaya etimadın səviyyəsidir. Bazarın inkişafı baxımdan həmçinin sığorta şirkətlərinin inkişaf səviyyəsi və maliyyə sabitliyi, etibarlı olması, peşəkarlığı, sığortaçıların gəlirlərinin və sığortaya tələbatın artması, bazardakı sığorta məhsullarının geniş çeşidi də mühüm əhəmiyyət kəsb edir. Bütün bunlara nəzər salaraq inamla söyləyə bilərik ki, son on ildə bazar xeyli böyüyüb və davamlı dinamik inkişafdadır. Bununla yanaşı bəzən tənəzzüllə də üzləşirik. Məsələn, 2006-2008-ci illərdə əldə edilən artım tempi 2009-2010-cu illərdə nisbətən azaldı, amma 2011-ci ildə bazarda yeni canlanma başladı. Bir çoxları bu dəyişkənliyin səbəbini dünya iqtisadiyyatındakı sabitsizlikdə görür, amma mənim fikrimcə başqa səbəblər də var. Belə ki, sığorta şirkətlərinin müxtəlif sığorta növlərindən topladıqları mükafatları (buna şərti olaraq sığorta bazarının portfeli deyək) təhlil etsək, yerli sığorta bazarındakı dalğalanmanın da səbəbləri aydınlaşar. Bu gün sığorta bazarı portfelinin xeyli hissəsi iri korporativ müştərilərdən gələn mükafatlardan, bankların girov əmlakının sığortası üzrə mükafatlardan və icbari sığorta növləri üzrə mükafatlardan ibarətdir. Fərdi şəxslər üçün könüllü sığorta növləri üzrə mükafatlar isə portfelin cüzi hissəsidir. Belə olan halda sığorta bazarının bütöv inkişaf dinamikası məsələn, bir-iki iri müqavilənin uzadılmaması, bir və ya bir neçə bank tərəfindən kreditlərin dayandırılması və ya nisbətən kiçik olması, icbari sığortaya dair hansısa qanunun qəbulu və ya dəyişdirilməsi kimi amillərlə dəyişə bilər. Bu kimi risklərdən qorunmaq, daha davamlı dinamik inkişafa nail olmaq üçün hazırda bir çox sığortaçının zəhmətli olduğuna görə təəssüf ki, məhəl qoymadığı fərdi şəxslərin könüllü sığortalanmasının inkişafı çox vacibdir.
Bir qədər qəribə görünsə də, könüllü fərdi sığortanın inkişafında icbari sığorta mühüm rol oynaya bilər. İcbari Sığortalar Haqqında qanun qəbul edilərək qüvvəyə minib. İcbari sığortalanma sığorta şirkətlərinə əlavə qazanc gətirməklə yanaşı müştərilərin çoxalması və müştərilərə könüllü sığorta növləri məhsullarının satışı üçün də şərait yaradar ki, bu da daha mühüm məsələdir. Üstəlik icbari sığorta növləri məhsullarının satışı nəticəsində sığortaçılar distribütor şəbəkəsini genişləndirə və möhkəmləndirə bilərlər.
Elə sığorta agentlikləri və agentləri də inkişaf etmək üçün icbari sığorta növlərinə möhtacdırlar. Belə ki, icbari sığorta növlərini, yəni müştərinin məcburi qaydada və bütün hallarda alacağı sığorta məhsullarını satan agentlər və agentliklər əlavə gəlir əldə edərək əlavə müştərilər qazanırlar. Bu da könüllü riteyl sığortasının inkişafına mühüm təkandır.
Yadımdadır, hələ bir neçə il əvvəl təyyarə biletlərini almaq üçün aviaşirkətlərin ofislərinə gedirdik. İndi isə ölkənin müxtəlif şəhərlərində yüzdən artıq turizm agentliyi az qala hər addımbaşı təyyarə biletləri satırlar. Biletlər elektron variantda da satılır, onları hər yerdə almaq olar. Heç şübhəsiz ki, sığortada da eyni vəziyyət yaranacaq, sığorta müqaviləsini şirkət ofisində yox, ölkə boyu saysız-hesabsız sığorta agentliklərinin birindən də ala biləcəyik. Çox güman ki, həmin müqavilələr də elektron variantda olacaq.
Sığorta bazarının inkişafına AXA-nın töhfəsi barədə sualınıza gəlincə, fikrimcə başlıca töhfəmiz bəhs etdiyimiz prosesi tezləşdirmək, o vaxtları bizə yaxınlaşdırmaq ola bilər. Gec-tez bu, mütləq baş verəcək.
- AXA MBASK şirkətinin gələn ildəki planları haqqında bir-iki kəlmə deyərdiniz.
- Bu il başladığımız quruculuq işləri gələn il mütləq bəhrəsini verməlidir. Sığorta mükafatların daha da artmasını gözləyirik, çünki bunun üçün imkanlarımız var. Agent şəbəkəsini daha da genişləndirmək, bir çox ölkələrdə geniş rəğbət qazanan AXA sığorta məhsullarını Azərbaycandakı müştərilərimizə təqdim edib onları sevindirmək niyyətindəyik. Həmçinin xidmət səviyyəsini də yüksəltmək üçün planlarımız var. Qısası, 2012-ci il daha maraqlı olacaq, ilk növbədə də müştərilərimiz və tərəfdaşlarımız üçün. İnamla deyə bilərəm - gözlədiyinizdən də artığını həyata keçirməyə hazırıq.
- Bəs Yeni İl ərəfəsində müştərilərinizə və tərəfdaşlarınıza nələr arzulayırsınız?
- Bu siyahını bir qədər də uzadıb müştərilərimizə, tərəfdaşlarımıza, əməkdaşlarımıza, səhmdarlarımıza, agentlərimizə, brokerlərimizə, rəqiblərimizə, başqa sığorta şirkətlərindəki həmkar və dostlarımıza, sığorta nəzarəti xidmətinə, habelə bütün Azərbaycan xalqına qarşıdakı 2012-ci ildə firavanlıq, əmin-amanlıq və ruzu-bərəkət arzulayıram!
