Azərbaycan, Bakı, 2 yanvar /Trend müxbir A.Axundov/
Noyabrda Bakının avtomobil bazarında təklif 1,4 faiz artıb. Bu barədə bazar ertəsi Trend-ə "Əmlak Bazarı İştirakçıları" İctimai Birliyindən məlumat veriblər.
Məlumata əsasən, bazarda tələbat təklifi üstələyib. Tələbatın artması və bazarda dinamikanın yüksəlməsi noyabrda avtomobillərin bahalaşmasına təsir göstərib. Ay ərzində qiymətlər 1,4 faiz artıb, bazarda avtomobilin orta hesabla qiyməti 15945 dollar təşkil edib.
"Bazarda dinamikanın artımı əmlakın ekspozisiya müddətinin azalmasına səbəb olub. Belə ki, ekspozisiya müddəti təkrar bazarda 1,2 faiz azalaraq 45,1 günə qədər enib" , - təşkilatın mütəxəssisləri hesab edirlər.
Ay ərzində təşkilat təkrar avtomobil bazarında monitorinq keçirib. Monitorinqin araşdırma predmeti 13200 ədəddən çox avtomobil olub. Onlardan yalnız 31,3 faizi oktyabrda bazarda təklif edilib, 68,7 faizi isə əvvəlki aylardan qalıb. Son vaxtlar köhnə avtomobillərin bazara kütləvi axını xeyli azalıb.
Təkrar bazarında uzun müddətdir lider mövqeyini saxlayan "Mercedes" markalı avtomobillərin təklif həcmi oktyabra nisbətdə noyabrda 1,2 faiz azalıb. Bu markalı avtomobillərin bazarda payı 31,8 faiz təşkil edir.
Bazar portfelində 9 markada olan avtomobillərin payına 83,7 faiz düşür, qalan 16,3 faiz 20-dən artıq avtomobil şirkətinin 80-dən çox markasının payına düşür.
Ekspertlərin fikrincə, köhnə avtomobillərin təkliflər portfelində payının hələ də yüksək olmasına baxmayaraq, yaxın müddətdə bazarda üstünlük 2003-cü il və növbəti illərin istehsalı olan avtomobillərə keçəcək.
Araşdırma göstərir ki, son aylar alıcıların ofrouder tipli avtomobillərə marağı artıb və gözlənilir ki, bazarın yenilənməsi yaxın 2 ildə bu növ avtomobillərin təkliflər portfelində payının kəskin artmasına gətirib çıxaracaq. Bu gün onların bazarda payı 24,6 faiz təşkil edir, halbuki sedanların payı 68,4 faiz təşkil edir.