Azərbaycan, Bakı, 12 yanvar /Trend, müxbir A.Axundov/
2011-ci ildə Azərbaycanın həyat sığortası bazarı 2010-cu ildəki 1,46 milyon manatdan 15,45 dəfə artaraq 22,55 milyon manata çatıb. Trend-in məlumatına görə, bu barədə cümə axşamı Maliyyə Nazirliyi yanında Dövlət Sığorta Nəzarəti Xidmətinin saytında dərc edilən nazirliyin 2011-ci ildə sığortaçıların fəaliyyətinin yekunları üzrə hesabatında deyilir.
Belə xeyli artım 2010-cu ilin dekabrında peşə xəstəlikləri və istehsalatda bədbəxt hadisələr nəticəsində peşə əmək qabiliyyətinin itirilməsi hallarından icbari sığortanın tətbiqinə başlanması ilə bağlıdır.
Həyat sığortası üzrə Azərbaycan şirkətləri ("Atəşgah Həyat", "Qala Həyat" və "Paşa Həyat") ilk iş ilində bu növ üzrə 18,9 milyon manat toplayıblar ki, bu da life-sığorta sahəsində yığımların 83,81 faizini təşkil edir.
İcbari sığorta növünün tətbiqi həyat sığortasının könüllü növlərinin inkişafı üçün də təkan olub. Belə ki, könüllü sığorta üzrə yığımlar il ərzində 2,5 dəfə artaraq 3,65 milyon manata çatıb.
Azərbaycanın sığorta bazarında həyat sığortasının payı il ərzində bazarın özünün təxminən 37 faiz artımı fonunda 0,94 faizdən 10,59 faizə çatıb (istehsalatda icbari sığorta üzrə yığımlar nəzərə alınmadan 1,71 faiz təşkil edir).
Bununla belə, 2011-ci ildə həyat sığortası şirkətləri proqnozlaşdırılan məbləğin yarısından bir az çoxunu toplayıblar. Sığortaçılar 2011-ci ildə bazarın potensialını 40 milyon manat səviyyəsində və daha çox qiymətləndiriblər.
Azərbaycan Sığortaçılar Assosiasiyasının icraçı direktoru Azər Əliyevin fikrincə, bu, bəzi elementlər işləmədiyinə görə baş verib. Məsələn, işçilərin istehsalatda bədbəxt hadisələr və peşə xəstəliklərindən icbari sığortası haqqında qanunun icrası üzərində ciddi nəzarəti göstərmək olar.
"Öz əməkdaşlarını sığortalamaq haqqında fikirləşməyən çox sayda şirkətlər var", - Əliyev əvvəllər Trend-ə deyib.
İnzibati Xətalar Məcəlləsinə uyğun olaraq (253.1-ci maddə), istehsalatda icbari sığorta üzrə müqavilə bağlamayan müəssisə 150-200 manata qədər cərimələnə bilər.
Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin göstərişlərinin yerinə yetirilməyəcəyi təqdirdə həmin məcəlləyə (318.1 maddə) uyğun olaraq, müəssisənin vəzifəli şəxsləri 1000 manatdan 2000 manata qədər cərimənin ödənilməsinə cəlb edilə bilər.
Qanuna əsasən, təşkilati-hüquq formalarından asılı olmayaraq, bütün müəssisələr, idarə və təşkilatlar, eləcə də hüquqi şəxs yaratmadan sahibkarlıq fəaliyyəti ilə məşğul olan fiziki şəxslər əmək müqaviləsi və ya mülki-hüquq müqaviləsi əsasında işin yerinə yetirilməsi, eləcə də fərdi qaydada sahibkarlıq və əmək fəaliyyəti üçün cəlb edilən işçilərini peşə xəstəlikləri və bədbəxt hadisələrdən sığortalamalıdırlar.
Ötən il həyat sığortasının ciddi inkişafı 2012-ci il üçün nikbin proqnozlar verməyə əsas verir.
Əliyevin sözlərinə görə, Azərbaycanın life-sığorta bazarı 2012-ci ildə 15-20 faiz arta bilər.
"Gələn il sığortaçılarımız icbari sığortadan könüllü növlər üzrə satışların daha aktiv tətbiqinə keçməlidirlər. Çünki insanlar artıq bu barədə bilirlər, müəyyən satışlar var. Bu baxımdan həyat sığortası bazarı 2012-ci ildə 15-20 faiz artacaq. Hər şey sığortaçıların bunun vacibliyini əhaliyə çatdırma qabiliyyətindən və məhsulu satmaq bacarığından asılı olacaq", - o deyib.
Yeni müqavilələrin bağlanması, yığımların artımı həyat sığortası növləri üzrə ödənişlərin artımına ciddi təsir etməyib. Belə ki, il ərzində onlar 41,36 faiz artaraq 470 min manata çatıb.
Azərbaycanda bu gün həyat sığortası üzrə 3 şirkət fəaliyyət göstərir. Onlar peşə xəstəlikləri və istehsalatda bədbəxt hadisələr nəticəsində əmək qabiliyyətinin itirilməsi hallarından icbari sığorta üzrə xidmətlərin göstərilməsi üçün lisenziyalara malikdirlər. Bunlar "Atəşgah Həyat", "Qala Həyat" və "Paşa Həyat" şirkətləridir.
Dövlət Sığorta Nəzarəti Xidməti hazırda həyat sığortası üzrə şirkətlərin yaradılması üçün bir neçə təklifi nəzərdən keçirir.
Ümumilikdə, Azərbaycanda 29 sığorta və 1 təkrar sığorta şirkəti fəaliyyət göstərir. Bununla yanaşı, "Fidan Sığorta"nın sığorta fəaliyyəti göstərməsi üçün lisenziyası dayandırılıb.
Yanvarın 12-nə olan rəsmi məzənnə 0,7864 AZN/USD təşkil edir.