Azərbaycan, Bakı, 15 fevral /Trend, müxbir N.İsmayılova/
2011-ci ildə təcili pulköçürmə sistemləri üzrə Azərbaycana 1046,2 milyon manat daxil olub ki, bu da 2010-cu ilin yekunları üzrə analoji göstəricini 19,3 faiz, 2009-cu ilin yekunları üzrə eyni dövrün göstəricisini isə 44,9 faiz üstələyir. Trend-in məlumatına görə, bu barədə çərşənbə günü Azərbaycan Mərkəzi Bankının (AMB) statistik hesabatında deyilir.
2010-cu ildə bu göstərici 876,9 milyon manat, 2009-cu ildə isə 722,2 milyon manat təşkil edib. 2011-ci il ərzində ölkəyə 1834,7 min pul köçürməsi həyata keçirilib. Bu rəqəm 2010 və 2009-cu illərdə müvafiq olaraq, 1627,9 min və 1295,3 min olub. 2011-ci ilin dekabrında ölkəyə bir köçürmənin orta məbləği 562 manat təşkil edib.
2011-ci il ərzində təcili pulköçürmə sistemləri üzrə Azərbaycandan həyata keçirilən köçürmələrin həcmi 416,4 milyon manat təşkil edib ki, bu da 2010-cu ilin yekunları üzrə göstəricini (306,6 milyon manat) 35,8 faiz üstələyir. 2009-cu ildə 149,1 milyon manat məbləğində köçürmələr həyata keçirilib.
2011-ci il ərzində ölkədən həyata keçirilən köçürmələrin sayı 464,8 min ədəd təşkil edib. Bu göstərici 2010 və 2009-cu illərdə müvafiq olaraq, 447,9 min və 326,9 min ədəd olub. 2011-ci ilin dekabrında ölkədən həyata keçirilən köçürmələrin orta məbləği 956,4 manat təşkil edib.
Fevralın 15-nə olan rəsmi məzənnə 0,7861 AZN/USD təşkil edir.
