Azərbaycan, Bakı, 16 fevral /Trend, müxbir A.Axundov/
2012-ci ilin yanvarında Azərbaycanda sənaye istehsalı həcmi (məhsul istehsal edilib və sənaye xarakterli xidmət göstərilib) 3,06 milyard manat təşkil edib ki, bu da 2010-ci ilin analoji göstəricisinə uyğun gəlir. Bu barədə cümə axşamı Trend-ə Dövlət Statistika Komitəsindən məlumat veriblər.
Ötən ilin analoji dövrü ilə müqayisədə özəl sektorun payı 1,3 faiz azalaraq ümumi sənaye istehsalının 81,9 faizini təşkil edib. Bununla yanaşı, 92,4 faiz sənaye məhsulları, 7,6 faiz isə sənaye xarakterli xidmətlərin payına düşüb.
Sənayenin qeyri-neft sektorunda məhsul istehsalı 14,4 faiz artıb.
Hesabat dövründə hasilat sənayesində məhsul istehsalı həcmi 2,8 faiz azalaraq ümumi sənaye istehsalının 77,9 faizlik xüsusi çəkisində 2,4 milyard manat təşkil edib.
Hesabat dövründə hasil edilən neftin həcmi 3,9 milyon ton (il ərzində 4,5 faiz azalma), təbii qazın hasilatı 1,6 milyard kubmetr (32,9 faiz artım) təşkil edib.
Emal sənayesi istehsalı həcmi 7,9 faiz artaraq 485,1 milyon manat təşkil edib.
Qida məhsulları istehsalı 8,5 faiz, toxuculuq sənayesi məhsulları istehsalı 57,2 faiz, poliqrafiya fəaliyyəti 47,0 faiz, rezin və plastmas məmulatları istehsalı 75,4 faiz, metallurgiya sənayesi məhsulları istehsalı 84,6 faiz, hazır metal məmulatları istehsalı 95,8 faiz, kompüter və digər elektron avadanlıqlar istehsalı 15,8 dəfə, maşın və avadanlıqların istehsalı 30,6 faiz, sair nəqliyyat vasitələri istehsalı 21,3 faiz, mebel istehsalı 3,4 dəfə, maşın və avadanlıqların quraşdırılması və təmiri 6,3 dəfə artıb.
Ölkədə kolbasa məhsulları istehsalı 14,4 faiz artaraq 247,5 ton təşkil edib, duru bitki yağı 1,6 dəfə (3,5 min ton), marqarin 1,6 dəfə (3 min ton), qənd 2,3 dəfə (43,3 min ton) artıb.
Fevralın 16-na olan rəsmi məzənnə 0,7861 AZN/USD təşkil edir.
