Azərbaycan, Bakı, 17aprel /Trend, müxbir E.İsmayılov /
Azərbaycanla Rusiya arasında ticari-iqtisadi münasibətlərin strukturu təkmilləşmə tələb edir. Bu barədə çərşənbə axşamı Trend-ə Parlamentin İqtisadi siyasət komitəsinin sədri Ziyad Səmədzadə bildirib.
Çərşənbə axşamı Bakıda Azərbaycan-Rusiya biznes forumu keçirilir. Forum Azərbaycanın Ticarət-Sənaye Palatası tərəfindən təşkil olunub.
"Ölkələrimiz arasında mal dövriyyəsi ilbəil artır və artıq üç milyard dollara yaxınlaşır. Təbii ki, münasibətlərimizin strukturu təkmilləşdirmə tələb edir. Azərbaycan öz qarşısına qeyri-neft sektorunu sürətlə inkişaf etdirmək tapşırığı qoyduğuna görə bu, ölkələr arasında xarici ticarət əməliyyatlarının strukturuna da təsir edir", - Səmədzadə deyib.
Onun sözlərinə görə, Azərbaycan və Rusiya strateji tərəfdaşdır və həmin qarşılıqlı münasibətlər hələ SSRİ dövründən qoyulub.
"Azərbaycan müstəqil dövlət olduqdan sonra Rusiya ilə münasibətlər yeni prinsiplər - bazar iqtisadiyyatı və dövlətçilik əsasında inkişaf etməyə başladı", - Səmədzadə deyib.
Millət vəkili bildirib ki, Rusiya ilə ticari-iqtisadi münasibətlərin strukturu neft sektorunun daha çox üstünlük təşkil etdiyi digər ölkələrlə münasibətlərin strukturundan fərqlənir. "Və bu gün artıq əməkdaşlığın konkret sahələri mövcuddur, məsələn, aqrar sektor. Azərbaycan humanitar sahədə də, innovasiya texnologiyaları sahəsində də Rusiyanın başqa subyektləri ilə də münasibətlər qurur", - Səmədzadə qeyd edib.
