Azərbaycan, Bakı, 17 aprel /Trend, müxbir E.İsmayılov/
Yaxın illərdə Azərbaycanla Rusiya arasında mal dövriyyəsi beş milyard dolları keçə bilər. Bu barədə çərşənbə axşamı Trend-ə Parlamentin İqtisadi siyasət komitəsinin sədri Ziyad Səmədzadə bildirib.
Çərşənbə axşamı Bakıda Azərbaycan-Rusiya biznes forumu keçirilir. Forum Azərbaycanın Ticarət-Sənaye Palatası tərəfindən təşkil olunub.
"Əgər biz Rusiya Federasiyasının subyektləri ilə münasibətlərin intensiv inkişafını təmin etsək, onda əlbəttə, yaxın illərdə mal dövriyyəsi beş milyard dolları keçə bilər", - Səmədzadə deyib.
Onun fikrincə, yaxşı investisiya mühitinin yaradılması, hüquq bazasının yaxşılaşdırılması, hər iki tərəfin investisiyalarının müdafiəsinin təmin edilməsi vacibdir.
"Bu gün bir çox azərbaycanlı iş adamları Rusiyada yeni sahibkarlıq mühitinin formalaşmasında iştirak edirlər", - Səmədzadə qeyd edib.
2011-ci ilin yekunlarına görə, iki ölkə arasında mal dövriyyəsi yeni həddə çataraq 3,077 milyard dollar təşkil edib.