Azərbaycan, Bakı, 30 aprel /Trend, müxbir A. Axundov/
Azərbaycan sığorta bazarında yeni oyunçu olan "Royal Sığorta" şirkəti Azərbaycan Sığortaçılar Assosiasiyasına (ASA) üzv olmaq təklifini nəzərdən keçirir. Bu barədə bazar ertəsi Trend-ə şirkətin İdarə Heyətinin sədri Nüsrət Babayev bildirib.
Maliyyə Nazirliyi yanında Dövlət Sığorta Nəzarəti Xidməti 2011-ci il dekabrın 28-də "Royal Sığorta" şirkətinə sığorta fəaliyyəti göstərmək üçün beşillik lisenziya verib. "Royal Sığorta" 2011-ci ilin oktyabrın 11-də dövlət qeydiyyatından keçib.
"Biz ASA-dan təklif almışıq və hazırda onu nəzərdən keçiririk", - Babayev qeyd edib.
Azərbaycanda 28 sığorta və 1 təkrar sığorta şirkəti fəaliyyət göstərir. "Royal Sığorta"dan başqa bütün şirkətlər ASA-nın üzvüdür.
Sığorta şirkətinin təsisçiləri qismində 5 fiziki şəxs çıxış edir.