Azərbaycan, Bakı, 22 may / Trend, müxbir Ə.Həsənov /
İslam İnkişaf Bankı (İİB) kiçik və orta biznesin inkişafı məqsədilə Azərbaycan banklarına kreditin ayrılması layihəsinə baxmağa hazırdır. Bu barədə çərşənbə axşamı Trend-ə İİB-in Azərbaycandakı nümayəndəsi Tamerlan Tağıyev bildirib.
"İİB kredit ayıra biləcəyi bankları müəyyən edib, lakin hazırkı məqamda biz üç il ərzindəki maliyyə audit hesabatlarını gözləyirik", - Tağıyev deyib.
Onun sözlərinə görə, bu hesabatları əldə etdikdən sonra İİB kreditin ayrılması ilə bağlı risklərə baxmağa hazırdır. Bu yalnız bankların İİB tərəfdən maliyyələşdirmənin şərtləri ilə razı olub-olmayacaqlarından asılı olacaq.
İslam İnkişaf Korporasiyası (ICD) kiçik və orta sahibkarlığın inkişafı üçün Azərbaycan bankına 40 milyon dollar ayırmağı planlaşdırır. İCD-in maliyyələşdirilməsinin həcmlərinin genişlənilməsi ilə əlaqədar tərəfdaş bankların siyahısını artıracağı güman edilir.
Bununla əlaqədar ötən ildən ICD beş-altı Azərbaycan bankı ilə danışıqlar aparır, həmin banklara korporasiya ilə əməkdaşlığın şərtləri göndərilib, öz növbəsində, onlardan yoxlanılmış maliyyə hesabatları alınıb.