Azərbaycan, Bakı, 19 sentyabr /Trend, müxbir A.Axundov/
Azərbaycan ilə Sloveniya arasında turizm sahəsində əməkdaşlığın inkişafı üçün iki ölkənin şəhərləri arasında birbaşa çarter reyslərinin açılması vacibdir. Trend-in məlumatına görə, bu barədə iqtisadi inkişaf naziri Şahin Mustafayev çərşənbə günü Bakıda keçirilən Azərbaycan-Sloveniya işgüzar görüşündə çıxışı zamanı bildirib.
"Azərbaycanda Sloveniya vətəndaşları üçün maraqlı ola biləcək ciddi turizm potensialı var. Azərbaycanlı turistlər yeni regionlar və səyahət yerləri axtarırlar. Bu planda birbaşa aviareyslərin açılması vacibdir", - nazir deyib.
Onun sözlərinə görə, bundan başqa, Sloveniya əhalisini Azərbaycan barədə, müvafiq olaraq, Azərbaycan əhalisini Sloveniya barədə məlumatlandırmaq çox vacibdir.
"Bununla yanaşı, əməkdaşlıq qarşılıqlı faydalı olmalıdır", - Mustafayev deyib.
Sloveniyanın Turizm və Beynəlxalq Münasibətlər Direktorluğunun rəhbəri Maryan Xribarın sözlərinə görə, ilin sonunadək tərəflər iki ölkənin turizm operatorlarının iştirakı ilə görüşlər təşkil etməlidirlər.
"Sloveniya haqqında informasiyanın Azərbaycanın, eyni zamanda, Azərbaycan haqqında məlumatların Sloveniyanın turizm operatorlarının kataloquna daxil edilməsi vacibdir", - Xribar deyib.
