Azərbaycan, Bakı, 18 oktyabr /Trend, müxbir C.Nəsibova/
Bosniya və Herseqovinanın aparıcı mühəndis şirkəti "Energoinvest" Azərbaycan şirkətlərini əməkdaşlığa dəvət edir. Trend-in məlumatına görə, bu barədə cümə axşamı jurnalistlərə Bakıda keçirilən birgə biznes forumda iştirak edən şirkətin baş direktoru Enes Şenqiç deyib.
O, Azərbaycanın texniki sektorunda fəaliyyət göstərən bütün şirkətləri Bosniya və Herseqovina ilə əməkdaşlığa dəvət edib.
"Bu, Bakıya birinci gəlişimdir, lakin deməliyəm ki, Azərbaycanda şirkətlərimiz, o cümlədən, "Energoinvest" üçün xeyli imkanlar var. Bu imkanlar, xüsusilə, enerji və nəqliyyat, habelə telekommunikasiya və informasiya texnologiyaları sahələrində mövcuddur", - Şenqiç bildirib.
Qeyd edək ki, "Energoinvest SC Sarayevo" dövlət şirkətinin əsası 1951-ci ildə qoyulub. Şirkət ölkənin aparıcı enerji müəssisəsidir.
