Azərbaycan, Bakı, 15 noyabr /Trend, müxbir A.Axundov/
Avropa Yenidənqurma və İnkişaf Bankı (AYİB) Azərbaycanda yeni dörd illik fəaliyyət strategiyasının hazırlanmasına başlayır. Bu barədə cümə axşamı Trend-ə AYİB-in Azərbaycandakı nümayəndəliyinin rəhbəri Nil Makkeyn bildirib.
"Biz ölkə üçün dörd il müddətinə (2013-2016-cı illər) yeni strategiya hazırlayırıq. Strategiya üzərində iş hələ başlanmayıb", - Makkeyn qeyd edib.
Onun sözlərinə görə, bu məqsədlə Azərbaycana 2013-cü ilin birinci rübündə Londondan nümayəndə heyəti gələcək. Nümayəndə heyəti yeni strategiya üzrə bütün məsələləri yalnız hökumətlə deyil, həm də qeyri-hökumət təşkilatları və digər tərəflərlə müzakirə edəcək.
"Yeni strategiyanın hazırlanmasında məqsəd iqtisadiyyatın inkişafında və onun diversifikasiyasında Azərbaycana kömək etməkdir. Azərbaycanın qeyri-neft sektorunda artım, əgər bütovlükdə iqtisadiyyatın artım sürəti ilə müqayisə edilərsə, çox böyükdür. Biz düşünürük ki, diversifikasiya kifayət qədər fəal gedir", - Makkeyn deyib.
Onun sözlərinə görə, strategiyanın əsas istiqaməti özəl sektorun istehsal, aqrar və maliyyə kimi müxtəlif sahələri ilə iş olacaq.
"Bu seqmentlər bizim bankımız üçün çox maraqlıdır və xeyli potensial layihə var. Bu gün biz ölkənin vəsaitlərinin uzunmüddətli idxal əvəzedici layihələrə yönəldiyini görürük", - Makkeyn deyib.
AYİB-in Azərbaycanda indiki strategiyası kiçik özəl müəssisələrin, bank sektorunun və iqtisadiyyatın qeyri-neft sektorunun inkişafına dəstəyə yönəldilib.
Bu günədək AYİB Azərbaycanda iqtisadiyyatın müxtəlif sektorlarında 120-dən artıq layihənin maliyyələşdirilməsinə 1,5 milyard dollar vəsait ayırıb.
