Azərbaycan, Bakı, 4 dekabr /Trend, müxbir C.Nəsibova/
Azərbaycanda təminatlı əqdlərin həyata keçirilməsi üçün səmərəli sistem yaradılması lazımdır. Bu barədə "Təminatlı əqdlər üzrə hüquqi islahatlar: növbəti addimlar" mövzusuna həsr olunmuş konfransın açılışında Avropa Yenidənqurma və İnkişaf Bankının (AYİB) Bakı nümayəndəliyinin rəhbəri Nil Makkeyn bildirib.
"Bunun üçün təminatlı əqdlər üzrə dəyişikliklərin və islahatların irəliləməsi vacibdir və bu, qanun layihəsində öz əksini tapmalıdır", - Makkeyn deyib.
Onun sözlərinə görə, qanun layihəsi bazarda baş verən proseslərə cavab verməlidir, onun təşəbbüsçüsü kimi Azərbaycan hökuməti çıxış etməlidir.
"Qanun layihəsinin hazırlanmasında peşəkar hüquqşünaslar, özəl, o cümlədən bank sektoru iştirak etməlidir. Çünki bankların borc alanlar barədə informasiyaya malik olmaları vacibdir", - Makkeyn deyib.
Onun sözlərinə görə, habelə bu qanunun icrası üçün icraçı strukturlar yaradılmalıdır.
Belə qanunun qəbulu daşınan əmlak sahəsində girov rolunda çıxış edən maliyyə institutlarının risklərini azaltmağa, kreditlərə çıxışı yüksəltməyə və girov qoyulan əmlakla dələduzluq hərəkətləri ehtimalını azaltmağa imkan verəcək.
Yaradılması bu layihədə nəzərdə tutulan daşınan əmlak reyestri daşınan əmlakın bütün növləri haqqında informasıyanı özündə birləşdirəcək. Bu zaman yalnız məsələn, avtomobil, texnikanın müxtəlif növləri kimi artıq qeydiyyatdan keçmiş daşınan əmlak növləri istisna təşkil edəcək.
