Azərbaycan, Bakı, 6 dekabr /Trend, müxbir A.Axundov/
2012-ci ildə Avropa Yenidənqurma və İnkişaf Bankının (AYİB) Azərbaycan iqtisadiyyatının özəl sektoruna rekord səviyyədə investisiya yatırdığı qeydə alınıb. Trend-in məlumatına görə, bu barədə cümə axşamı jurnalistlərə AYİB-in Azərbaycandakı nümayəndəliyinin rəhbəri Nil Makkeyn deyib.
"Bank 2012-ci ildə özəl sektorda 100 milyon dollar (78 milyon avro) məbləğində 15 layihəni maliyyələşdirib ki, bu da layihələrin sayı və maliyyələşdirmənin həcmi baxımdan rekord hesab olunur. İlin sonunadək AYİB-in daha 3 yeni layihədə iştirakı mümkündür", - Makkeyn qeyd edib.
Onun sözlərinə görə, AYİB 20 il ərzində Azərbaycanda 127 layihənin iştirakçısı olub, bunlardan 115 layihə özəl sektorda həyata keçirilib.
"Bankın Azərbaycan üzrə büdcəsi təqribən 2 milyard avro, cari portfeli 692 milyon avrodur. Bununla da, AYİB Azərbaycan iqtisadiyyatının qeyri-neft sektorunun iri investorudur", - Makkeyn deyib.