Azərbaycan, Bakı, 14 dekabr /Trend, müxbir A.Axundov/
2012-ci ilin yanvar-sentyabr aylarında kreditlər və digər investisiyalar formasında cəlb olunmuş sərmayələrin xüsusi çəkisi xarici kapitalın strukturunda 47,6 faiz (3612,9 milyon dollar) təşkil edib. Bu məbləğ əsasən birbaşa dövlət və dövlət təminatlı və banklar tərəfindən cəlb edilmiş kreditlər hesabına formalaşıb. Trend-in məlumatına görə, bu barədə Azərbaycan Mərkəzi Bankının (AMB) tədiyyə balansında deyilir.
Kreditlərin 37,1 faizi (805,1 milyon dollar) birbaşa dövlət və dövlət təminatı əsasında cəlb edilmiş kreditlər (beynəlxalq maliyyə və digər təşkilatlar tərəfindən ayrılmış kreditlər), 62,9 faizi (1363,6 milyon dollar) isə dövlət təminatı olmayan kreditlərdir ki, bunun da 1102,4 milyon dolları banklar, 261,2 milyon dolları isə digər müəssisələr və firmalar tərəfindən cəlb olunub.
Əvvəlki dövrlərdə cəlb edilmiş kreditlər üzrə 1638,5 milyon dollar geri qaytarılıb. Qaytarılmış kreditlərin 46,3 faizi (758,4 milyon dollar) bank sisteminin, 13,6 faizi (223,4 milyon dollar) dövlət və dövlət təminatı əsasında cəlb olunmuş kreditlərin, 28,5 faizi (466,3 milyon dollar) neft-qaz sektorunun, 11,6 faizi (190,4 milyon dollar) isə digər müəssisələr və firmaların payına düşür.
